Balkan we Daşoguz welaýatlarynyň daýhanlary Watan harmanyna bugdaýyň bereketli hasylyny tabşyryp, şertnamalaýyn borçnamalaryny üstünlikli ýerine ýetirdiler. Bu barada welaýat häkimleri 8-nji iýulda Prezident Serdar Berdimuhamedowa sanly ulgam arkaly geçirilen iş maslahatynda hasabat berdiler.
Balkan welaýatynyň häkimi H.Aşyrmyradow we Daşoguz welaýatynyň häkimi S.Soltanmyradow bu hoş habary aýdyp, döwlet Baştutanyna we türkmen halkynyň Milli Liderine oba hojalyk pudagynyň ösdürilmegine berýän yzygiderli ünsi üçin sebitiň ýaşaýjylarynyň adyndan hoşallyk bildirdiler.
Häkimler şeýle hem ekerançylyk meýdanlaryndaky işleriň ýagdaýy baradaky hasabatlaryny berdiler. Bellenilişi ýaly, häzirki wagtda ýygnalan hasyly elewatorlara we ammarlara daşamak, ýerleşdirmek, önüm öndürijiler bilen hasaplaşyklaryň öz wagtynda geçirilmegini üpjün etmek boýunça degişli işler dowam edýär. Bugdaý oragyndan boşan meýdanlarda sürüm işlerini geçirmek, geljek ýylyň hasyly üçin ýokary hilli tohum taýýarlamak boýunça işler ýerine ýetirilýär.
Daşoguz welaýatynyň häkimi S.Soltanmyradowyň hasabatyna görä, welaýatyň gallaçy daýhanlary şu ýyl Watan harmanyna 270 müň tonnadan gowrak bugdaý hasylyny tabşyrdylar.
Serdar Berdimuhamedow Balkan we Daşoguz welaýatlarynyň edermen gallaçylaryny bu gazanan üstünlikleri bilen tüýs ýürekden gutlady.
