ABŞ-nyň Miçigan uniwersitetiniň we Meksikanyň Puebla şäherindäki Astrofizika, optika we elektronika milli institutynyň alymlary itleriň üýrmesine düşünip bilýän emeli aň (AI) ulgamyny döretdiler.
Ilkibaşda adam dilini seljermek üçin döredilen Wav2Vec2 modelini ulanyp, barlagçylar AI-ni itiň dürli hili - gaharly, oýun edip we gorkudan ýaňa üýrmelerini tanamagy öwretdiler.
“Itiň diline” has gowy düşünmek üçin hünärmenler Tepikde we Puebl-de 74 itiň üýrüşini öwrendiler. Ýaşy bäş aýdan 84 aýa çenli aralykdaky - ortaça 35 aýlyk bolan şol itler, esasan, çihuahua, fransuz pudeli we şnauserlerdi. Ýazgylar, itleriň hakyky seslerini almak üçin, tebigy öý şertlerinde edildi. Öý haýwanlarynyň dürli görnüşli sesleri çykarmagy üçin ýörite dürli gyjyndyrmalary döretdiler. Bu gyjyndyrmalaryň içinde ýanynda nätanyş adamyň bolmagy, oýun etmek, mähirli sözleri aýtmak we hatda eýesine hüjüm edenden bolmak ýaly ýagdaýlar bardy.
Hasaplama lingwistikasy, dil çeşmeleri we baha bermek boýunça bilelikdäki halkara konferensiýada hödürlenen barlagyň netijesi AI-niň diňe bir üýrmäniň görnüşlerini tapawutlandyrmak bilen çäklenmän, eýsem sesine görä itiň tohumyny, ýaşyny we hatda jynsyny hem kesgitläp biljekdigini görkezdi.
Bu ösüş adamlar bilen haýwanlaryň arasynda aragatnaşygyň täze mümkinçiliklerini açýar. Geljekde bu itlere düşünip we olaryň üýrmelerine jogap berip bilýän çat-botlaryň ösdürilmegine sebäp bolup biler. Mundan başga-da, barlag haýwanlaryň zerurlyklaryna we duýgularyna has gowy düşünmek arkaly, olaryň hal-ýagdaýyny gowulaşdyrmaga mümkinçilik berip biler.
Şeýle-de bolsa, barlagçylar netijeleriň tassyk bolmagy üçin it tohumlarynyň has giň sanawyny we has köp dürli görnüşlerini ulanmak bilen, goşmaça barlaglaryň geçirilmeginiň zerurdygyny bellediler.
