Ulsandaky Milli Ylym we Tehnologiýa Institutynyň (UNIST) alymlary robotlar üçin täze görnüşli emeli myşsa taýýarladylar. Bu material ynsan we haýwan myşsalaryndaky ýaly çeýeligi we berkligi özünde jemleýär. Hasaplamalara görä, eger adam şeýle myşsalara eýe bolsady, ol bir eli bilen pil saklap biljekdi.
Myşsalar NdFeB magnit bölejikleri goşulan polimerden ýasalypdyr. Bu bölejikler materialyň gatylygyny hakyky wagtda üýtgetmäge mümkinçilik berýär. Material gyzdyrylanda ýumşap, magnit meýdanynda gerekli forma alýar, soňra sowap gatylaşýar. Şeýlelikde, polimeriň himiki we fiziki baglanyşyklary birleşdirilip, “myşsa ýady” emele getirilýär.
Barlaglar täsirli netijeleri görkezdi: myşsa 1274 % çenli uzalyp, 86,4 % çenli gysylýar we tebigy myşsadan 30 esse köp iş ýerine ýetirip bilýär. Onuň gatylygy rezinadan gaty plastmassa çenli üýtgäp bilýär. 1,2 gramlyk kiçijik polosa gaty ýagdaýda 5 kilogram agrama çenli saklap bilýär.
Bu ösüş entek senagat taýdan ulanmakdan uzak bolsa-da, ýumşak robot tehnikasynyň ösüşinde uly mümkinçilikleri açýar: şeýle robotlar adamlara howpsuz ýagdaýda hyzmat edip biler hem-de agyr işleri ýerine ýetirip biler. Şol bir wagtyň özünde çözülmedik käbir meseleler hem bar — mysal üçin, gyzdyryş we sowadyş prosesleriniň haýallygy, bu ýagdaýyň hakyky şertlerde amaly taýdan peýdaly bolmazlygy we “myşsa ýadyny” işjeňleşdirmek üçin ýeterlik güýçli magnit meýdany döretmegiň kynçylygy. Şeýle-de bolsa, geljekki barlaglaryň bu meseleleri çözmäge mümkinçilik berjekdigi aýdylýar.
