Ak tamda UFC Freedom 250 turniriniň ýeňijilerine gowşuryljak ýörite çempionlyk guşagynyň tanyşdyrylyş dabarasy boldy. 15-nji iýunda Waşingtonda geçiriljek bu bäsleşik ABŞ-nyň garaşsyzlygynyň 250 ýyllyk baýramçylygyna bagyşlanýar.
Dizaýny ABŞ-nyň milli baýdagynyň resmi reňklerine esaslanýan täze guşagyň esasy aýratynlygy, adaty UFC gysgaltmasynyň ýokarsynda ýerleşdirilen «250» belgidir.
ABŞ-nyň prezidenti Donald Trampyň aýtmagyna görä, bu turnir Ak tamyň taryhyndaky iň uly sport çäresidir we tomaşaçylar üçin giriş doly mugt bolar.
«Meniň pikirimçe, bu Ak tamda geçirilen iň uly waka bolar. Adatça bu ýerde sport ýaryşlary geçirilmeýär. Bular dünýäniň iň güýçli çempionlary we iň ökde söweşijileridir» diýip, Yahoo Sports neşiri prezidentiň sözlerini getirýär.
Turniriň iň esasy wakasy ýeňil agramda çempionlyk ugrundaky söweş bolar. Guşaga eýe bolmak üçin Ispaniýanyň we Gruziýanyň wekili Iliýa Topuriýa bilen amerikan söweşijisi Jastin Getži dalaş eder.
Prezident bilen duşuşyga Topuriýa we Getžiden başga-da ýaryşyň beýleki ýyldyzlary Aleks Pereýra we Siril Gan hem gatnaşdy. Duşuşygyň dowamynda Topuriýa degşip, Donald Trampdan näme üçin öz dostuna (Getžä) beýle kyn synag taýýarlandygyny sorady. Ol bu henek arkaly, şol ýerdäki MMA ýyldyzlarynyň arasynda Getžiniň ýeke-täk amerikalydygyna üns çekmek isledi.
