Hindistanda dowam edýän aşa yssy howa zerarly Nýu-Deliniň ýol polisiýasynyň işgärleri içine sowadyş ulgamy gurnalan şlemleri geýip başladylar.
Başgap kiçijik wentilýatorlar we howa geçiriji ulgam bilen enjamlaşdyrylypdyr. Olar howa akymyny şlemiň içine gönükdirýärler hem-de köçelerdäki uzaga çekýän gözegçilik wagtynda aşa gyzmagyň öňüni almaga kömek edýärler.
Enjam zarýad berilýän akkumulýator bilen işleýär hem-de wentilýasiýany işjeň howa üflemek prosesi bilen utgaşdyrýar. Şeýle ulgam dykyz şäher gatnawy we ýokary temperatura şertlerinde polisiýa işgärleriniň işe ukyplylygyny saklamaga kömek eder diýlip çaklanylýar.
Täze esbaba bolan zerurlyk ýurduň uly bölegini gurşap alan yssy howa akymy sebäpli ýüze çykdy. Hindistanyň birnäçe sebitlerinde anomal ýokary temperaturalar "gyzyl" derejeli howpuň yglan edilmegine getirdi. Ýurduň günogarynda gyzgyn urmagy sebäpli azyndan 16 adam aradan çykdy.
Meteogulluklaryň maglumatlaryna görä, käbir sebitlerde howanyň temperaturasy kadadan 3–5 dereje ýokary bolup, kä ýerlerde bu tapawut has-da güýçlendi. Birnäçe şäherlerde soňky günlerde yssylyk +45 °C-den geçdi. Gijeki temperaturalaryň hem ýokarylygyna galmagy zerarly ilat gündizki yssydan soň özlerini dürsemäge-de mümkinçilik tapmaýar.
Saglygy saklaýyş ulgamynyň hünärmenleri aşa yssy howanyň bedeniň suwsuzlanmagyna, ganyň goýalmagyna we agyr ýagdaýlarda içki beden agzalaryň işiniň durmagyna sebäp bolup biljekdigini aýdýarlar. Käbir sebitleriň häkimiýetleri garry adamlara, çagalara we hamyla zenanlara juda zerurlyk bolmasa, gündizlerine daşary çykmazlygy maslahat berýärler.
