Barlagçylar 6G ulgamlarynda, sensorlarda we telekommunikasiýa böleklerinde ulanylyp bilinjek täze, ýüpek esasly material işläp düzdüler. Bu tehnologiýanyň dokma galyndylaryny azaltmakda hem peýdalydygy göz öňünde tutulýar.
Bu işläp düzme ýüpek süýümleriniň himiki reagentlerde eremezden, fiziki taýdan berkleşýändigine esaslanýar. Süýümler 125-den 215 gradus Selsiý aralygyndaky temperatura çenli gyzdyrylýar we 1900-den 9800 atmosfera çenli basyşlara sezewar edilýär. Bu suwy aýyrýar we materialyň gurluşy esasy kristal elementlerini saklap galmak bilen, bir gatlaga birleşýär.
Alymlar ýüpegiň häsiýetleriniň onuň içki gurluşy bilen baglanyşyklydygyny belleýärler, ol özüne kristal we amorf bölekleri birleşdirýär. Bu gurluş materiala hem çeýelik, hem berklik berýär.
"Şeýle çeýe material üçin ol geň galdyryjy derejede berk. Bu hili işleýiş arkaly biz beýleki köp sanly biomateriallaryň mümkinçiliklerinden öňe geçip bileris" - diýip, barlagyň awtory Çunmeý Li belledi.
Londonyň Imperiýa kollejinden Emiliano Bilottiniň aýtmagyna görä, barlagçylar tebigy süýümleriň gurluşyny gorap saklamagy maksat edinipdirler.
"Ýüpegiň ajaýyp häsiýetleri onuň iýerarhiki mikro gurluşyndan gelip çykýar. Biz mümkin boldugyndan süýümiň asylky durkuny köpräk saklap galmak isledik" - diýip ol mälim etdi.
Topar häzirki wagtda tehnologiýany giňeltmegiň we ony optiki elementlere, sensorlara we telekommunikasiýa ulgamlaryna ornaşdyrmagyň mümkinçiligini öwrenýär. Täze çemeleşmäniň daşky gurşawa täsiri hem seljerilýär.
Eger tehnologiýanyň köpçülikleýin önümçilige ýaramlydygy tassyklansa bolsa, material 6G enjamlarynda, ýeňil gurluşlarda, gaplamalarda we biolukmançylyk implantlarynda ulanylyp bilner.
