OpenAI kompaniýasy eýýäm öwredilen emeli aň modellerini işletmek üçin niýetlenen «Jalapeno» atly ýöriteleşdirilen çibiniň ilkinji nusgalarynyň taýýardygyny we ony synagdan geçirip başlandygyny mälim etdi. Kompaniýa bu ädim arkaly öz hyzmatlarynyň netijeliligini ýokarlandyrmagy hem-de gelýän soraglary işlemek üçin edilýän çykdajylary azaltmagy maksat edinýär.
Bu çip Broadcom kompaniýasy bilen bilelikde işlenip düzüldi. Broadcom-yň baş direktory Hok Tanyň aýtmagyna görä, täze çözgüt adaty grafiki prosessorlar (GPU) bilen deňeşdirilende 50%-e çenli serişdeleri tygşytlamaga mümkinçilik berýär.
OpenAI we Broadcom kompaniýalary bu prosessoryň gysga wagtyň içinde düýbünden täze taslama hökmünde döredilendigini hem-de inferens wezipeleri ýerine ýetirilende sarp edilýän her watt energiýa üçin has ýokary öndürijiligi üpjün edýändigini belleýär.
«Jalapeno» çibi emeli aň modelleri bilen işlemek üçin niýetlenen bolup, ol hasaplama serişdeleriniň, ýadyň we tor infrastrukturasynyň ulanylyş aýratynlyklaryny göz öňünde tutýar. Çipleriň gutarnykly wersiýalaryny eýýäm şu ýylyň ahyryna çenli Microsoft-yň we OpenAI-yň beýleki hyzmatdaşlarynyň iri maglumat merkezlerinde gurnamak meýilleşdirilýär.
«Jalapeno» çibiniň indiki neslini çykarmak bolsa 2028-nji ýyla meýilleşdirildi. Şeýle-de, işläp düzüjiler geljekde beýleki agramly wezipeler üçin hem ýöriteleşdirilen çipleriň döredilip bilinjekdigini inkär etmeýär.
Ýylyň başyndan bäri OpenAI çipleri işläp düzmek, maglumat merkezlerini gurmak we hünärmenler toparyny giňeltmek boýunça taslamalary maliýeleşdirmek üçin 122 milliard dollar maýa goýum çekdi. Bu yglan edişlikden soň, Broadcom kompaniýasynyň paýnamalary 1,6% ýokarlandy we 386,25 dollara ýetdi.
