Braziliýanyň Riwýera-de-San-Lourensu plýažynda dynç alýanlar seýrek duş gelýän atmosfera hadysasynyň — sosial mediada "asman sunamisi" diýlip atlandyrylan ägirt uly düýrlem buludyň şaýady boldular.
Meteored meteorologiýa kompaniýasynyň habaryna görä, bu howa şertleri birden üýtgän mahalynda ýüze çykýan silindr görnüşli kese bulut bolan wolýutus” diýlip atlandyrylýan hadysadyr.
Şaýatlaryň aýmagyna görä, birnäçe minutyň içinde asman garalyp, deňizde tolkun bolupdyr we asuda howanyň ýerine güýçli ýel turup başlapdyr. Dynç alýanlaryň köpüsi tupandan gorkup, kenardan gidipdirler.
San-Paulu ştatynyň raýat goranyş gullugy bu hadysanyň "güýçli ýelleriň fronty" diýlip atlandyrylýan ýagdaý bilen baglanyşyklydygyny düşündirdi. Ol çabganyň ojagyndaky sowuk howa ýer bilen çaknyşanda we ýyly, çygly howany ýokaryk gysyp çykaranda emele gelýär. Netijede, görer göze hereket edýän tolkuna meňzeýän dik bulut emele gelýär.
Bilermenler wolýutusyň tornadodan ýa-da tüweleýden tapawutlanýandygyny we güýçli ýel bilen utgaşýan hem bolsa, zyýan ýetiriji güýjüniň ýokdugyny nygtadylar. Meteorologlaryň maglumatlaryna görä, kenarýaka boýunça ýeliň tizligi sagatda 60 kilometre ýetipdir.
Bu hadysanyň iň meşhur mysallarynyň biri Awstraliýanyň Karpentariýa aýlagy sebitinde yzygiderli syn edilýän Morning Glory buludydyr. Ol ýerde onuň uzynlygy 1000 kilometre ýetip bilýär.
