2026-njy ýylyň Atlantik harasatlar möwsüminiň ilkinji atlandyrylan tupany bolan «Artur» tropik tupany ABŞ-nyň günortasyndaky birnäçe sebitlerde sil suwlaryna we adatdan daşary ýagdaý düzgüniniň girizilmegine getirdi. Häzirki wagtda howp zolagynda 3 milliona golaý ýaşaýjy bar.
Tupan Tehas ştatynyň Galweston şäheriniň golaýynda emele geldi we onuň şemalynyň iň ýokary durnukly tizligi sagatda 72 kilometre ýetdi. Fox Weather gullugynyň berýän maglumatyna görä, kenarýaka sebitlerde tolkunlaryň belentligi 1 metre çenli ýetdi.
Soňra «Arturyň» derejesi post-tropik siklon ýagdaýyna çenli peseldildi, ýöne güýçli ýagyşlaryň we duýdansyz sil suwlarynyň gelmek howpy heniz hem saklanýar. Harasatlary öwrenmek boýunça milli merkez sebitlere 127-den 254 millimetre çenli, käbir ýerlerde bolsa 508 millimetre çenli ýagyş ýagmagyna garaşylýandygyny çaklaýar. Tebigy apatyň täsir zolagynda Tehasyň merkezi we demirgazyk kenarýakalary, Luiziananyň uly bölegi, şeýle hem Missisipi we Alabanyň käbir sebitleri ýerleşýär.
Ueýko şäherinde güýçli ýagyşlar ştatlarara «I-35» awtomagistralyny suw astynda galdyrdy, Boerne şäherinde bolsa aşa köp ýagan ýagyş sil suwlaryna sebäp boldy. Missisipi ştatynda suw joşguny sebäpli öý guşlary heläk boldy.
Görülen çäreler we howp astyndaky şäherler:
Tehasyň gubernatory Greg Ebbott ştatyň 101 sany etrabynda adatdan daşary ýagdaý rejimini yglan etdi we ýaşaýjylary suw basan ýollar arkaly hereket etmezlige çagyrdy. Iň çarkandakly we kyn ýagdaýa Baton-Ruž, Täze Orlean (New Orleans) we Morgan-Siti şäherlerinde garaşylýar, sebäbi bu ýerlerde uly göwrümli suw basmalarynyň döreme töwekgelçiligi ýokary.
Degişli hünärmenler Meksika aýlagynyň kenarýakasyndaky sil howpunyň hepdäniň ahyryna deňiç saklanjakdygyny duýdurýarlar.
