15-nji martda Aşgabatdaky «Watan» kinokonsert merkezinde «Iň eýjejik gyzjagaz — 2024» atly bäsleşigiň döwlet tapgyry geçirildi. Oňa bäsleşigiň Aşgabat, Arkadag şäher we welaýat tapgyrlarynda ýeňiji bolan zehinli gyzjagazlar gatnaşdylar. Jemleýji tapgyrda Baş baýraga Daşoguz welaýatynyň Saparmyrat Türkmenbaşy etrabyndaky 93-nji orta mekdebiň 2-nji synp okuwçysy Nurşat Myratowa mynasyp boldy.
Bäsleşigi Türkmenistanyň Magtymguly adyndaky Ýaşlar guramasynyň Merkezi geňeşi we Türkmenistanyň Bilim ministrligi bilen bilelikde gurady diýip, "Güneş" žurnalynyň elektron neşiri habar berdi.
Düzgünnama laýyklykda, oňa gatnaşýan gyzjagazlar üç şert boýunça bäsleşdiler. Birinji şertde 4 minutyň dowamynda eziz Watanymyzy, bagtyýar çagalygy, dost-doganlygy, sporty wasp edýän aýdym-sazly çykyşlar ýerine ýetirildi.
Gyzjagazlar ikinji şertde milli egin-eşiklerini şahyrana sözler bilen wasp etdiler. Üçünji şertde bolsa öz ýaş aýratynlyklaryna görä, ene-mamalarymyzdan nesilden-nesle geçip gelýän milli el işleriniň görnüşlerini ýerine ýetirmekde bäsleşdiler.
Türkmenistanyň Ýaşlar guramasynyň Merkezi geňeşiniň, Bilim ministrliginiň wekillerinden hem-de ýurdumyzyň tanymal medeniýet we sungat işgärlerinden ybarat eminler topary bäsleşige gatnaşýan gyzjagazlaryň her bir çykyşyna mynasyp baha berdiler. Eminler toparynyň gelen netijesine görä, şu ýeňijiler yglan edildi:
1-nji orun: Arkadag şäherindäki iňlis dili dersine ýöriteleşdirilen 2-nji orta mekdebiň 3-nji synp okuwçysy Aýmelek Gylyçmyradowa;
2-nji orun: Aşgabat şäherindäki 147-nji orta mekdebiň 2-nji synp okuwçysy Aýlar Çaryýewa;
3-nji orun: Lebap welaýatynyň Dänew etrabyndaky 2-nji orta mekdebiň 2-nji synp okuwçysy Aýna Döwletýarowa.
Ýeňijilere guraýjylar tarapyndan Hormat hatlary we sowgatlar gowşuryldy.
Ýurdumyzyň umumybilim berýän orta mekdepleriniň 2 — 4-nji synplarynda okaýan okuwçy gyzlaryň arasynda geçirilýän bu bäsleşik indi birnäçe ýyl bäri Milli bahar baýramynyň öňüsyrasynda guralyp, baýramçylyk şatlygyny artdyrýar.
