25-nji dekabrda Prezident Serdar Berdimuhamedow obasenagat toplumyna gözegçilik edýän wise-premýer T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi.
Maslahatyň barşynda häkimler welaýatlarda Täze ýyl baýramyny ýokary guramaçylyk derejesinde geçirmek hem-de bu baýramyň bellenilýän günlerinde welaýatlaryň bazarlaryny we dükanlaryny azyk önümleri bilen doly üpjün etmek boýunça görülýän zerur çäreler barada hasabat berdiler.
Bellenilişi ýaly, medeni-durmuş maksatly binalaryň ýyladyş ulgamlarynyň talabalaýyk işledilmegi we ilatyň elektrik energiýasy, tebigy gaz, agyz suwy bilen üpjünçiligi gözegçilikde saklanylýar.
Şunuň bilen bir hatarda, baýram günlerinde edara-kärhanalarda gije-gündiz nobatçylygy guramak boýunça degişli işler geçirilýär.
Serdar Berdimuhamedow Täze ýyl mynasybetli dabaralaryň ýokary guramaçylyk derejesinde geçirilmegi, baýramçylyk günlerinde bazarlaryň we dükanlaryň dürli azyk harytlary bilen bolelin we elýeterli bahalardan üpjün edilmegi babatda welaýatlaryň häkimlerine degişli tabşyryklary berdi.
