Ýakyn wagtda Türkmenistan Hazar deňziniň üsti bilen Azerbaýjana we Türkiýä elektrik energiýasyny iberip biler.
Trend agentliginiň habar bermegine görä, bu barada Türkmenistanyň Halk Maslahatynyň Başlygy Gurbanguly Berdimuhamedow 3-nji noýabrda Astanada Türki Döwletleriň Guramasynyň 10-njy sammitinde eden çykyşynda belledi.
Gurbanguly Berdimuhamedowyň bellemegine görä, bu günki gün Türkmenistan öz elektrik energiýasyny Özbegistan we Gyrgyzystan ýaly goňşy ýurtlara iberýär. Şeýle hem türkmen halkynyň Milli Lideri şu günüň özünde Hazar deňziniň türkmen kenarynda Türkmenbaşy etrabynda kuwwatlylygy 1574 megawatta deň bolan utgaşykly dolanyşykda işlejek elektrik stansiýasynyň gurluşygyna badalga berlendigini belläp geçdi.
Şunuň bilen baglylykda Gurbanguly Berdimuhamedow Türki Döwletleriň Guramasyna gatnaşýan ýurtlar tarapyndan energetika pudagynda hyzmatdaşlygy ösdürmek boýunça «Ýol kartasyny» taýýarlamagy teklip etdi.
