Türkmenistanyň welaýatlarynda, etraplarynda, Aşgabatda we Arkadag şäherinde mekdep harytlarynyň söwdasy şu ýylyň 1-nji awgustyndan 5-nji sentýabryna çenli geçiriler.
Bu barada wise-premýer B.Atdaýew anna güni geçirilen Hökümet mejlisinde döwlet Baştutanyna habar berdi.
Bellenilişi ýaly, Söwda we daşary ykdysady aragatnaşyklar ministrliginiň söwda düzümleri tarapyndan okuwçylar we talyplar üçin harytlary öndürijiler hem-de iberijiler bilen bilelikde ýurdumyzyň bazarlaryny okuw esbaplary, okuwçy we sport egin-eşikleri, aýakgaplar, beýleki harytlar bilen üpjün etmek boýunça degişli işler alnyp barylýar.
Serdar Berdimuhamedow hasabaty diňläp, mekdep okuwçylary we talyplar üçin zerur bolan okuw esbaplarynyň söwdasy guralýan mekdep harytlarynyň bazarlaryny ýola goýmagyň asylly däbe öwrülendigini we olaryň ýerleşdirilýän ýerleriniň alyjylar üçin amatly bolmagy, mekdep harytlarynyň bolçulygynyň üpjün edilmegi ugrunda ähli çäreleri görmegiň zerurdygyny belledi we wise-premýere bu babatda birnäçe anyk tabşyryklary berdi.
