Halkara ynsanperwer ylymlary we ösüş uniwersitetiniň Halkara ykdysadyýet we menejment fakultetiniň 4-nji ýyl talyby Daniýar Emirkulyýew Türkmenistanyň ýokary okuw mekdepleriniň talyplarynyň arasynda geçirilen «Ýylyň talyby» döwlet bäsleşiginiň baş baýragyna mynasyp boldy.
Bu ýyl bäsleşigiň jemleýji tapgyry 15-16-njy iýunda geçirildi we onda Daniýar ýurduň öňdebaryjy ýokary okuw mekdeplerine wekilçilik edýän zehinli ýaşlaryň arasynda iň ýokary netijäni görkezip, «Ýylyň talyby — 2026» diýen abraýly ady aldy.
Bäsleşigiň şertlerine laýyklykda, gatnaşyjylaryň ylmy-döredijilik işleri, halkara olimpiadalarda we sport ýaryşlarynda gazanan üstünlikleri, jemgyýetçilik çärelerine gatnaşyklary hem-de KHBS-däki çykyşlary kesgitlenen utuklar ulgamy boýunça bahalandyryldy. Jemleýji tapgyrda bolsa bäsleşige gatnaşyjylara jemgyýetçilik durmuşyny öwreniş, häzirki zaman kompýuter tehnologiýalary we iňlis dili boýunça ýörite test sowallary hödürlendi.
Bäsleşigiň netijeleri boýunça ýeňiji bolan Daniýar Emirkulyýew we baýrakly orunlary eýelän beýleki talyplar bäsleşigi guraýjylar — Türkmenistanyň Bilim ministrligi hem-de Kärdeşler arkalaşyklarynyň Milli merkezi tarapyndan diplomlar we gymmat bahaly sowgatlar bilen sylaglandy.
Bu döwlet bäsleşiginiň esasy maksady takyk we ynsanperwer ylymlary gowy bilýän, sanly tehnologiýalardan hem-de daşary ýurt dillerinden erkin baş çykarýan zehinli talyplary ýüze çykarmakdan we goldamakdan ybaratdyr.
