Türkmenistanyň Bilim ministrligi 2026/2027-nji okuw ýyly üçin Hytaý Halk Respublikasynyň Sinszýan-Uýgur awtonom raýonynyň ýokary okuw mekdeplerine ýokary hünär bilimi (bakalawr) maksatnamasy boýunça seçip alyş işini geçirýär.
Okuwa girmäge isleg bildirýän dalaşgärleriň resminamalary 2026-njy ýylyň 16-21-nji iýuny aralygynda Halkara ynsanperwer ylymlary we ösüş uniwersitetinde kabul edilýär.
Resminamalary binýatlyk bilimi umumy orta bilimden pes bolmadyk, 18 ýaşy dolýan we 25 ýaşdan geçmeýän hem-de iňlis dilini bilýän Türkmenistanyň raýatlary tabşyryp biler. Okuwa tabşyrmak üçin gerekli resminamalaryň sanawy we goşmaça maglumatlar Bilim ministrliginiň saýtynda elýeterlidir. Resmi iş kagyzlarynyň terjimeleri iňlis dilinde bolmaly.
Okadyljak hünärler, okuwa kabul etmegiň sany we şertleri baradaky maglumatlary bolsa kabul ediş toparyndan alyp bolýar.
Dalaşgärler resminamalar bilen birlikde şahsy pasportyny, daşary ýurt pasportyny, harby şahadatnamasyny ýa-da harby gullugy geçmedik ýigitler ýazylyş şahadatnamasyny kabul ediş toparyna görkezmeli we nusgalaryny tabşyrmalydyr. Nädogry we galp maglumatlar üçin dalaşgär şahsy jogapkärçilik çekýär.
Kabul edilen resminamalaryň netijeleri boýunça ýokary görkezijilere eýe bolan dalaşgärler bilen 2026-njy ýylyň 23-nji iýunynda Halkara ynsanperwer ylymlary we ösüş uniwersitetinde umumybilim berýän dersler boýunça seçip alyş söhbetdeşligi geçiriler.
Halkara ynsanperwer ylymlary we ösüş uniwersitetiniň salgysy:
- Aşgabat ş., 1958-nji (Andalyp) köçesi, 169,
- tel.: (+993 12) 39-85-62, 39-85-25
- elektron salgysy: admissionihd@gmail.com
