Hytaýda ýokary bilim ulgamynyň giň gerimli özgertmeleri dowam edýär. Şoňa laýyklykda, 2021-nji ýyldan 2025-nji ýyla çenli bolan döwürde ýurtda bakalawr maksatnamalarynyň 12,2 müňüsi ýatyryldy ýa-da wagtlaýynça togtadyldy.
South China Morning Post neşiriniň ýazmagyna görä, olaryň ýerine häzirki zaman tehnologiýalary we zähmet bazarynyň talaplary bilen baglanyşykly 10,2 müňe golaý täze ugurlar açyldy.
Hytaý Halk Respublikasynyň Bilim ministrliginiň maglumatlarynda bu üýtgeşmeleriň uniwersitet maksatnamalarynyň 30%-den gowragyna täsir edendigi aýdylýar. Iň uly gysgaltmalar ynsanperwer ylymlarynda (filologiýa, taryh we ş.m.), sungatda, daşary ýurt dillerinde hem-de dolandyryş (menejment) ugurlarynda boldy. Emeli aňyň we awtomatlaşdyrmagyň ösmegi bilen, bu hünärler boýunça uçurymlaryň sanynyň aşa köpdügi hem-de olara islegiň azalýandygy bellenilýär.
Alnyp barylýan özgertme ýokary bilimi ykdysadyýetiň tehnologik ösüşine uýgunlaşdyrmaga gönükdirilendir. Şol bir wagtyň özünde Hytaýyň uniwersitetleri döwlet üçin iň zerur bolan pudaklara hünärmenleri taýýarlamagy giňeldýärler.
Mysal üçin, eýýäm dokuz sany ýokary okuw jaýy «janlandyrylan emeli aň» (embodied EA) — ýagny emeli aňy önümçilik we inženerçilik ulgamlaryna ornaşdyrmak ugrur boýunça täze hünärleri açdy.
Bu özgertmeleriň çaltlandyrylmagyna ýaşlaryň arasyndaky işsizlik derejesiniň 16%-den geçmegi hem goşmaça sebäp boldy. Şeýle ýagdaýda häkimiýetler okuw maksatnamalaryny zähmet bazarynyň hakyky isleglerine laýyk getirmäge çalyşýarlar.
