22-nji maýda Prezident Serdar Berdimuhamedow obasenagat toplumyna gözegçilik edýän wise-premýer A.Ýazmyradowyň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Onda ýurdumyzyň oba hojalyk toplumynda hem-de welaýatlarynda alnyp barylýan işleriň barşy bilen bagly meselelere garaldy.
Maslahatyň barşynda welaýat häkimleri hem-de wise-premýer A.Ýazmyradow häzirki wagtda ýerlerde dowam edýän möwsümleýin oba hojalyk işleriniň barşy barada hasabat berdiler.
Welaýatlaryň gowaça ekilen meýdanlarynda gögeriş almak, ýekelemek, otag etmek hem-de hatarara bejergi işleri agrotehnikanyň kadalaryna laýyklykda ýerine ýetirilýär.
Şunuň bilen birlikde, bugdaýa ideg etmek işleri alnyp barylýar.
Şeýle hem welaýatlarda “Soňky jaň” dabarasyny guramaçylykly geçirmek boýunça hem-de Oba milli maksatnamasyna laýyklykda, şu ýyl welaýatlarda açylyp ulanylmaga berilmegi meýilleşdirilýän dürli maksatly
desgalarda hem-de binalarda alnyp barylýan gurluşyk işleriniň ýagdaýy barada hasabat berdiler.
Prezident Serdar Berdimuhamedow Ministrler Kabinetiniň Başlygynyň obasenagat toplumyna gözegçilik edýän orunbasarynyň hem-de welaýatlaryň häkimleriniň häzirki wagtda dowam edýän oba hojalyk işleriniň möhüm ähmiýetine ünsüni çekdi we şunuň bilen baglylykda, bu işleriň agrotehnikanyň kadalarynyň berk berjaý edilmegi arkaly geçirilmegi babatda degişli tabşyryklary berdi.
