Şu hepdede Türkmenistanda howanyň durnuksyz bolmagyna garaşylýar. Hepdäniň birinji ýarymynda aglaba sebitlerde ýagyn ýagyp, ýyldyrym çakar. Şemally howa bolar. Şeýle-de bolsa, hepdäniň ahyrynda ýene yssy bolmagyna garaşylýar.
Duşenbe güni siklonyň yza çekilmegi bilen, Hazar deňzinden çygly howa akymy gelip başlar. Balkan welaýatynyň kenarýaka sebitlerinde howa salkyn, gündizine temperatura +14 ... + 19°, sebitiň gündogarynda häzirlikçe +19 ... +24° bolar. Ahal welaýatynda +23… +28°, Daşoguz welaýatynda +22… +27°, Mary welaýatynda + 26… + 31°, Lebap welaýatynda häzirlikçe +33… +38° yssy howa saklanyp galar. Balkan, Daşoguz we Ahal welaýatlarynyň käbir ýerlerinde ýagyş ýagar we ýyldyrym çakar. 14-nji maýdan 15-nji maýa geçilen gije we 15-nji maýda gündiz agzalan sebitlerde şemalyň tizliginiň sekuntda 15-20 metre çenli güýçlenmegine garaşylýar.
Sişenbe güni ýurduň çet günorta-gündogar sebitlerinden başga ähli ýerinde sowuk howa akymy agdyklyk eder. Balkan sebitinde howa +15… +20°, Ahal, Mary we Daşoguz welaýatlarynda +18… +23°, Lebap welaýatynyň demirgazygynda +18… +23°-dan günortasynda + 27… +32°-a çenli bolar.
16-njy maýda Türkmenistanyň köp sebitinde şemal güýçlener. Balkan we Ahal welaýatlarynyň käbir ýerlerinde ýeliň tizligi sekuntda 17-22 metre çenli ýeter. Köp ýerde güýçli ýagyş ýagyp, ýyldyrym çakmagyna garaşylýar. Diňe Mary welaýatynda güýçli ýagyn bolmaz diýip çaklanylýar. Ýagyş Lebabyň käbir ýerlerinde ýagar.
Çarşenbe güni temperatura ýokarlanyp başlar. Balkan sebitinde eýýäm +20… +25°, kenarýaka sebitlerinde temperatura ondan birnäçe dereje pes bolar. Ahal welaýatynda temperatura + 21… + 26 °, Mary, Daşoguz we Lebap welaýatlarynda + 20… + 25 ° bolar. Balkanyň demirgazygynda, Daşoguz welaýatynda, şeýle hem Lebap sebitlerinde wagtal-wagtal ýagyş ýagar .
Penşenbe-anna günleri howanyň temperaturasynyň ýokarlanmagy dowam eder. Balkan welaýatynda dynç günleri temperatura eýýäm +26… +31°, Ahal, Mary, Lebap welaýatlarynda +28… +33°, Daşoguzda + 25… +30 ° bolar.
Dynç günleri ýene örän yssy howanyň bolmagyna garaşylýar. Yssy käbir ýerlerde +36 ... +41° çenli ýeter.
