Şu gün, 15-nji martda Aşgabatdaky Parahat-7 ýaşaýyş toplumynda ýerleşýän Hezreti Omar metjidinde türkmen halkynyň Milli Lideri Gurbanguly Berdimuhamedowyň galam hakynyň serişdelerine Türkiýe Respublikasynda köpsanly adam pidalaryna getiren ýertitreme sebäpli şehit bolanlaryň hatyrasyna sadaka berildi.
Mälim bolşy ýaly, türkmen halkynyň Milli Lideri şol agyr günlerde Türkiýe Respublikasynyň Aşgabatdaky Ilçihanasyna baryp, doganlyk ýurduň wekilleri bilen gynanjyny paýlaşdy we duýgudaşlyk bildirdi. Şonda pida bolanlary, öten-geçenleri hatyralap, sadaka beriljekdigi habar berildi.
Ine, bu gün bolsa, Oraza aýynyň öň ýanyndaky günlerde doganlyk Türkiýede bolup geçen hasratly ýertitremede şehit bolanlary hatyralap, Hezreti Omar metjidinde sadaka berildi.
Halk Maslahatynyň Başlygy ýygnananlara ýüzlenip, «Goý, şeýle sogaply günlerde berýän sadakamyz, edýän aýat-töwirlerimiz öten-geçenleriň ruhuna barsyn! Türkiýede bolup geçen ýertitremede şehit bolanlaryň, öten-geçenleriň jaýy jennet bolsun! Allatagala olara iman baýlygyny bersin!» – diýip, Türkmenistanyň müftüsine aýat-töwir edip bermek barada ýüzlendi.
Türkmenistanyň müftüsi tebärek çykandan soňra, sadaka gatnaşyjylara nahar çekildi. Tagam dadylandan soňra, aýat-töwir edildi.
Mälim bolşy ýaly, fewral aýynyň başynda Türkiýede köp sanly adam pidalaryna, agyr ýitgilere getiren güýçli ýertitreme bolup geçdi. Bu örän agyr tebigy betbagtçylyk hemmeleri gynandyrdy. Türkmenistan hem ilkinjileriň hatarynda bu ýurda doganlyk goluny uzatdy. Türkmenistandan doganlyk Türkiýe Respublikasyna ynsanperwerlik kömegi, ýagny ilkinji nobatda, zerur serişdeler iberildi.
Soňky maglumatlara görä, Türkiýede bolup geçen ýertitremelerinde aradan çykanlaryň sany 48 müň 448 adama ýetdi. Şolardan 6 müň 660 sanysy daşary ýurtlaryň raýatlarydyr.
