Türkmenistanyň Oguz han adyndaky Inžener-tehnologiýalar uniwersiteti 35 ýaşa çenli bolan ýurdumyzyň ähli ýaşlarynyň arasynda innowasion tehnologiýalaryň bäsleşigini yglan etdi.
Bäsleşige web sahypalarynyň we programma üpjünçilikleriniň, mobil goşundylaryň, robotlaryň, elektron enjamlaryň işjeň ýagdaýyndaky nusgasyny, sanly we innowasion ykdysadyýetiň modellerini, hyzmatlaryň innowasion görnüşlerini, himiki we biotehnologiýalar, kiberhowpsuzlyk we maglumat tehnologiýalar boýunça taslamalary, oba hojalygy, lukmançylyk we ş.m. beýleki islendik ugurlar boýunça öz işlerini we pikirlerini hödürläp bilerler.
Ýokary okuw mekdebi teklip edilýän taslamalaryň täze pikirleriň esasynda döredilen ýa-da kämilleşdirilen bolmagynyň hökmanydygyny ýatladýar.
Bäsleşik 2 tapgyrda geçirilýär
I tapgyra gatnaşmaga isleg bildirýänler öz taslamasy baradaky maglumatlary şu ýylyň 1-nji apreline çenli oguztaslama@gmail.com elektron poçtasyna elektron görnüşde ugradyp hasaba durmaly. Bäsleşige şahsy we toparlaýyn (3 adamdan köp bolmadyk) görnüşde gatnaşmaga rugsat berilýär. Hasaba alnan gatnaşyjylar taslamasyny doly görnüşde taýýarlap, onuň işjeň ýagdaýy baradaky beýany prezentasiýa görnüşinde (mümkin bolsa 1-3 minutlyk düşündirişli wideoýazgysy bilen) 1-nji maýa çenli ýokardaky elektron salgysyna ugratmaly. Netijeler Guramaçylyk topary tarapyndan 20-nji maýa çenli yglan ediler we uniwersitetiň internet sahypasynda görkeziler, şeýle-de telefon arkaly habar berler.
II tapgyr Ylymlar gününiň öňüsyrasynda 5-10-njy iýun aralygynda geçiriler. I tapgyryň ýeňijileri oňa uniwersitetde gurnaljak innowasion tehnologiýalaryň sergi- bäsleşigine öz işleri bilen gatnaşarlar. Bäsleşigiň ýeňijileri Ylymlar güni mynasybetli Türkmenistanyň Ylymlar akademiýasynyň uniwersitetde geçirjek halkara ylmy-amaly maslahatynyň çäklerinde yglan ediler. Ýeňijilere (1 sany Baş baýrak, 2 sany I ýer, 3 sany II ýer, 4 sany III ýer) diplomlar we gymmat bahaly sowgatlar gowşurylar hem-de okuwa we işe ýerleşmekde ýeňillik döretjek teklip hatlary (Recommendation letter) berler.
Bäsleşigi geçirmegiň tertibi we Düzgünnamasy baradaky giňişleýin maglumatlar uniwersitetiň internet sahypasynda ýerleşdirildi.
Habarlaşmak üçin telefonlar: +99363647081, +99365873093, +99364493354, +99365031996
Elektron poçta: oguztaslama@gmail.com
Web sahypa: etut.edu.tm
