Türkmenistanyň paýtagtynda 2018 — 2028-nji ýyllar üçin “Suw durnukly ösüş üçin” diýen halkara hereketleriň onýyllygynyň çäklerinde geçiriljek dördünji ýokary derejeli halkara maslahatyna taýýarlyk görmäge bagyşlanan brifing geçirildi.
Täjigistan Respublikasynyň Türkmenistandaky ilçisi Niýatbekzoda Wafo Alibek diplomatik wekilhananyň we köpçülikleýin habar beriş serişdeleriniň öňünde çykyş edip, geljekki forumyň ähmiýeti we formaty barada giňişleýin maglumat berdi.
2026-njy ýylyň 25–28-nji maýy aralygynda Duşenbe şäherinde geçiriljek bu maslahat Täjigistanyň Hökümeti tarapyndan BMG bilen ýakyn hyzmatdaşlykda guralýar. Maslahatyň esasy maksady 2030-njy ýyla çenli Gün tertibiniň suw bilen baglanyşykly maksatlaryna ýetmek, bilelikdäki tagallalary işjeňleşdirmek we innowasion çözgütleri tapmak üçin ählumumy platforma döretmekden ybarat.
Geljekki forum dört sany möhüm ugry öz içine alýar:
- Senegal we BAE-niň başlyklyk etmeginde geçiriljek 2026-njy ýyldaky BMG-niň Suw serişdeleri boýunça maslahatyna esasy taýýarlyk çäresi.
- Gerimini giňeldip boljak çözgütleri hödürlemek, hyzmatdaşlygy berkitmek we ileri tutulýan suw meselelerini çözmek üçin täze gatnaşyklary ýola goýmak;
- BMG-niň Baş sekretarynyň 2018–2028-nji ýyllar üçin Suw boýunça hereketleriň onýyllygynyň meýilnamasynyň dört ugry esasynda bu onýyllygyň durmuşa geçirilmegini işjeňleşdirmek;
- Suw boýunça hereketleriň onýyllygynyň jemleýji syny we 2030-njy ýyldan soňky döwür üçin BMG-niň suw boýunça gün tertibini döretmek barada pikir alyşmalara girişmek.
Bu maslahata döwlet wekilleri, halkara maliýe guramalary, alymlar, şeýle hem ýaşlar we zenanlar guramalary gatnaşar.
