Bütindünýä saglyk güni mynasybetli köpçülikleýin welosipedli ýörişler we beýleki sport çäreleri diňe bir Aşgabatda däl, eýsem Arkadag şäherinde hem-de ýurduň ähli welaýatlarynda geçirildi.
Aşgabat
Habar berşimiz ýaly, paýtagtymyzda welosipedli ýörişe Prezident Serdar Berdimuhamedowyň gatnaşmagynda geçirildi. Çäre Çandybil şaýolunyň we Bekrewe köçesiniň çatrygyndaky «Welosiped» binasynyň ýanyndan başlandy. Çärä döwlet edaralarynyň, jemgyýetçilik guramalarynyň, diplomatik wekilhanalaryň wekilleri, talyplar, mekdep okuwçylary we türgenler gatnaşdy. Ýörişiň ugry şäheriň merkezi şaýollaryndan geçdi. Ýol ugrunda döredijilik toparlarynyň çykyşlary guraldy. Weloýöriş Aşgabadyň merkezinde, «Ruhyýet» köşgüniň ýanynda tamamlandy.
Arkadag şäheri
Baýramçylyk çäreleri «Taýçanak» binasynyň öňündäki meýdançadan başlandy we şol ýerden welosiped ýörişine badalga berildi. Oňa häkimiýet edaralarynyň wekilleri, bilim, saglygy goraýyş we sport ulgamlarynyň işgärleri, talyplar, jemgyýetçilik guramalarynyň we köpçülikleýin habar beriş serişdeleriniň wekilleri gatnaşdy. Çärä şäher ilaty hem goşuldy. Ýöriş Ahalteke atlary, Akhan we Arkadag şaýollary boýunça geçdi. Weloýöriş konsert çykyşlary we medeni çäreler bilen utgaşdy.
Ahal welaýaty
Welosipedli ýöriş Ak bugdaý etrabynyň çäginden geçýän halkalaýyn aýlaw ýolundan başlanyp, Änew şäherine tarap ýola düşdi. Ýol ugrunda «Saglyk» binasynyň ýanynda, «Ak bugdaý» milli muzeýinde we «Mukaddeslik» meýdançasynda medeni çykyşlar guraldy.
Balkan welaýaty
Weloýörişine Balkanabat şäherindäki «Türkmeniň ak öýi» binasynyň ýanynda badalga berildi. Esasy çäreler 10 müň orunlyk sport toplumynyň öňünde geçirildi. Welosipedli ýöriş «Ilkinjiler» ýadygärliginiň ýanynda tamamlandy. Şeýle hem baýramçylyk çäreleri «Awaza» milli syýahatçylyk zolagynda, «Jadyly kenar» seýilgähinde we beýleki meýdançalarda boldy.
Daşoguz welaýaty
Çäreler Andalyp şaýolunyň ugrunda başlandy. Welosipedçiler, takmynan, 10 kilometr aralygy geçdi. Medeni çykyşlar meýdançalarda we şäher desgalarynyň ýanynda guraldy. Ýöriş 10 müň orunlyk stadionda tamamlandy.
Lebap welaýaty
Weloýöriş Türkmenabat şäherindäki «Ýüpek ýoly» binasynyň ýanyndan başlanyp, Bitarap Türkmenistan köçesi boýunça dowam etdi. Ýoluň ugrunda ýerleşýän mekdepleriň, teatryň we kitaphananyň ýanynda çykyşlar guraldy. Çäreler köpugurly sport toplumynda jemlendi.
Mary welaýaty
Welosipedli ýörişe gatnaşyjylar Kemine köçesinden Medeniýet köşgüne çenli, takmynan, 6 kilometr aralygy geçdi. Ýol ugrundaky muzeýiň, teatryň, kitaphananyň we şäheriň beýleki desgalarynyň ýanynda konsert çykyşlary boldy.
