2026-njy ýylyň 24-nji martynda Türkmenistanyň daşary işler ministri Raşid Meredow Uganda Respublikasynyň Daşary işler boýunça döwlet ministri Genri Oriýem Okello bilen duşuşyk geçirdi.
Gepleşikleriň dowamynda taraplar syýasy-diplomatik, söwda-ykdysady we medeni-ynsanperwer ulgamlarda ikitaraplaýyn hyzmatdaşlygyň häzirki ýagdaýyny hem-de geljekki mümkinçiliklerini ara alyp maslahatlaşdy. Bu barada daşary syýasat edarasynyň metbugat gullugy habar berýär.
Söhbetdeşligiň barşynda ikitaraplaýyn gatnaşyklaryň yzygiderli ösýändigi bellenilip, 2025-nji ýylyň awgustynda Ugandanyň premýer-ministri Robina Nabbandjiniň Awazada geçirilen BMG-niň Deňze çykalgasy bolmadyk ösüp barýan döwletler boýunça üçünji maslahatyna gatnaşmagynyň döwletara gatnaşyklarda möhüm tapgyr bolandygy nygtaldy.
Duşuşykda iki ýurduň Daşary işler ministrlikleriniň arasyndaky gatnaşyklary has-da işjeňleşdirmek maksady bilen, syýasy geňeşmeleriň birinji tapgyryny 2026-njy ýylyň ikinji ýarymynda Aşgabatda geçirmäge bolan gyzyklanma tassyklandy.
Taraplar BMG-niň çäklerinde parahatçylygy, howpsuzlygy we durnukly ösüşi üpjün etmek boýunça tagallalary utgaşdyrmagyň ähmiýetini belledi.
Şeýle-de, oba hojalygy we nebitgaz ulgamlarynda işewürlik gatnaşyklaryny ösdürmek üçin täze platformany döretmek barada pikir alşyldy. Bilim, ylym, medeniýet, sport we syýahatçylyk ugurlary boýunça hyzmatdaşlygy giňeltmek meýilleşdirilýär.
Gepleşikleriň ahyrynda taraplar özara bähbitli hyzmatdaşlygy mundan beýläk-de ösdürmäge taýýardyklaryny tassyklady.
