Türkmen halkynyň Milli Lideri, Halk Maslahatynyň Başlygy Gurbanguly Berdimuhamedow Hytaý Halk Respublikasyna bolan dostluk saparyny tamamlap, Türkmenistana gaýtdy.
TDH agentliginiň habar bermegine görä, Pekindäki çärelerden soň, ol «Şoudu» halkara howa menziline baryp, ol ýerden Türkmenistana uçdy. Birnäçe sagatdan soňra türkmen halkynyň Milli Lideriniň uçary Aşgabadyň halkara howa menziline gondy.
Howa menzilinde ony resmi adamlar garşylady.
Ýatlap geçsek, Hytaýa bolan saparynyň dowamynda Gurbanguly Berdimuhamedow HHR-iň Başlygy Si Szinpin bilen duşuşdy we oňa «Gadyrly» atly ahalteke bedewini sowgat berdi. Şeýle-de, ol Hytaýyň milli nebitgaz korporasiýasynyň (CNPC) ýolbaşçysy Daý Houlýan bilen gepleşikler geçirdi.
Mundan başga-da, saparyň çäginde Halk Maslahatynyň Başlygy Pekindäki «Equuleus» halkara atçylyk toplumyna baryp gördi we ol ýerde Halkara ahalteke atçylyk assosiasiýasynyň agzalary hem-de ahalteke bedewleriniň hytaýly muşdaklary bilen duşuşdy.
Sapar ikitaraplaýyn hyzmatdaşlygy ösdürmäge gönükdirildi. Taraplar dürli ulgamlarda özara gatnaşyklary dowam etdirmäge gyzyklanma bildirýändiklerini tassyklady.
