Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Hytaý Halk Respublikasyna amala aşyran dostluk saparynyň çäklerinde Hytaýyň Milli nebitgaz korporasiýasynyň (CNPC) direktorlar geňeşiniň başlygy Daý Houlýan bilen duşuşdy. Bu barada «Watan» habarlar gepleşiginde habar berildi.
Korporasiýanyň ýolbaşçysy Milli Lideri we Prezident Serdar Berdimuhamedowy ýetip gelýän Nowruz baýramy bilen gutlap, Türkmenistan bilen ýola goýlan hyzmatdaşlyga ýokary baha berdi. Ol bu gezekki saparyň hytaý-türkmen hyzmatdaşlygynyň ýokary derejesini tassyklaýan wakadygyny belledi.
Duşuşykda taraplar iki ýurduň arasyndaky hyzmatdaşlygyň häzirki ýagdaýyny we geljekki ugurlaryny ara alyp maslahatlaşdy. Gurbanguly Berdimuhamedow ýurduň “CNPC” korporasiýasy bilen özara tejribe alyşmagy dowam etdirmegi, hyzmatdaşlygy has-da ilerletmegi maksat edinýändigini tassyklady. Türkmen-hytaý gatnaşyklary ugurlaryň giň gerimini, şol sanda syýasy-diplomatik, söwda-ykdysady, ýangyç-energetika, ulag-aragatnaşyk, logistika, senagat, tehnologiýalar we medeni-ynsanperwer ulgamlary öz içine alýar.
Söhbetdeşligiň dowamynda ýangyç-energetika toplumy ikitaraplaýyn gatnaşyklaryň ileri tutulýan ugry hökmünde görkezildi. Milli Lider «CNPC-niň» nebitgaz pudagynda ygtybarly hyzmatdaşdygyny belläp, şu ýyl hyzmatdaşlygyň 20 ýyllygynyň dolmagy mynasybetli halkara ylmy-amaly maslahaty geçirmegi teklip etdi.
Şeýle hem «Galkynyş» gaz känini tapgyrlaýyn özleşdirmek boýunça gazanylan ylalaşyklaryň we müňlerçe täze iş orunlarynyň döredilmeginiň ähmiýeti nygtaldy. Mundan başga-da, sebit ähmiýetli Türkmenistan — Owganystan — Pakistan — Hindistan (TOPH) gaz geçirijisiniň möhüm bölegi bolan Serhetabat — Hyrat ugruna üns çekildi.
Daý Houlýan asyryň iri taslamalarynyň biri bolan Türkmenistan — Hytaý gaz geçirijisiniň durmuşa geçirilmeginde bitirilýän işler, şeýle-de Türkmenistanda döredilen amatly maýa goýum gurşawy üçin minnetdarlyk bildirip, ýolbaşçylyk edýän korporasiýasynyň hyzmatdaşlyk borçnamalaryna hemişe jogapkärçilikli çemeleşjekdigine ynandyrdy.
Duşuşygyň ahyrynda taraplar özara bähbitli gatnaşyklaryň mundan beýläk-de rowaçlanjakdygyna ynam bildirdi.
