Hytaýyň Söwda ministrligi Hytaý bilen ABŞ-nyň arasynda harytlaryň belli bir görnüşleri boýunça özara söwda gümrük paçlaryny azaltmak barada ylalaşyk gazanylandygyny yglan etdi.
Bloomberg agentliginiň Hytaýyň degişli edarasynyň resmi beýanatyna salgylanyp ýazmagyna görä, bu ädimler taraplar tarapyndan özara söwda dolanyşygyny, şol sanda ykdysadyýetiň oba hojalyk pudagyndaky söwdany giňeltmek maksady bilen ädilýär.
Pekin bilen Waşington bu mesele boýunça entek käbir ownuk-uşak soraglary ara alyp maslahatlaşmagy dowam etdirýärler. Şol sebäpli ministrligiň çap eden resminamasynda gümrük nyrhlary azaldyljak harytlaryň anyk sanawy getirilmeýär.
Şonuň bilen bir wagtda, Hytaýyň Söwda ministrligi ABŞ tarapyndan öňe sürülýän teklipleri hem-de amerikan oba hojalyk önümleriniň Hytaýyň çägine import edilmegi bilen baglanyşykly talaplary gözden geçirmegi meýilleşdirýändiklerini habar berdi. Şeýle-de Hytaý tarapynyň beýanatynda ABŞ-nda öndürilen uçarlaryň uly tapgyryny satyn almak baradaky meýil hem resmi taýdan tassyklanylýar, emma howa gämileriniň anyk sany we görnüşleri barada maglumat berilmeýär.
Ozal ABŞ-nyň Prezidenti Donald Tramp Pekine bolan saparynyň dowamynda birnäçe möhüm söwda şertnamalaryny, şol sanda 200 sany «Boeing» uçaryny getirmek baradaky ylalaşygy baglaşmagy başarandyklaryny köpçülikleýin mälim edipdi.
