Hytaýyň Çunsin şäherinde meýdany boýunça dünýäde iň uly hasaplanýan Gündogar demir ýol menziliniň gurluşygy tamamlandy. Umumy meýdany 1,22 million kwadrat metr bolan bu ägirt uly toplum Hytaýyň ýokary tizlikli demir ýol ulgamynyň esasy bölegine öwrüldi.
Menziliň gurluşygy 2018-nji ýyldan 2025-nji ýyla çenli dowam etdi. Bu döwür içinde 2 million kub metrden gowrak beton we 360 müň tonnadan gowrak polat sarp edildi. Desganyň eýeleýän meýdany takmynan 170 sany futbol meýdançasyna ýa-da iki sany Watikan döwletiniň çägine barabardyr.
Stansiýada jemi 29 sany demir ýol şahasy we 15 sany platforma hyzmat edýär. Ýurduň iň esasy ýokary tizlikli ugurlarynyň çatrygynda ýerleşýän bu menzil her gün ýüzlerçe müň ýolagça hyzmat etmäge niýetlenendir.
Çunsin şäherinde şeýle uly ulag merkezini gurmak baradaky karar 2011-nji ýylda, demir ýol ulgamy seljerilenden soň kabul edilipdi. Şäheriň amatly geografik ýerleşişi ony ýurduň iň esasy geçelgeleriniň birine öwürmäge mümkinçilik berdi.
Otly menziliniň binagärligi we içki gurluşy döwrebap aeroportlary ýatladýar. Bu usul häkimiýetleriň ýurt içindäki uçar gatnawlaryna alternatiwa hökmünde ýokary tizlikli demir ýol ulagyny ösdürmek syýasaty bilen baglanyşyklydyr. Häzirki wagtda Çunsinden paýtagt Pekine ýa-da Şanhaýa çenli ýol otly bilen bary-ýogy 6 sagat töweregi wagt alýar.
Şeýle hem, bu ägirt uly toplumyň çäginde umumy meýdany 270 müň kwadrat metrden gowrak bolan myhmanhanalar, restoranlar, ofisler we söwda merkezleri ýerleşýär.
