Hytaýyň häkimiýetleri daşary ýurtly syýahatçylar üçin salgytlary yzyna gaýtarmak ulgamyny düýpli döwrebaplaşdyrmak barada karar kabul etdiler. Täze düzgünler myhmanlaryň söwda etmegini aňsatlaşdyrmaga we ýurda gelýän syýahatçylaryň sanyny artdyrmaga gönükdirilendir.
Hytaýyň söwda ministrligi tarapyndan tanyşdyrylan täze taslamada daşary ýurtlularyň iň köp barýan söwda merkezlerinde, taryhy ýerlerinde, bazarlarynda we serhet geçelgelerinde «Tax Free» (salgydy yzyna gaýtaryp berýän) dükanlaryň sany köpeldiler. Netijede indi kagyz resminamalar we uzyn nobatlar bolmaz. Ähli çekler we resminamalar internet arkaly barlanar. Haryt satyn alnan badyna, salgyt puluny şol pursatda yzyna alyp bolýan hyzmatlar ösdüriler.
Şeýle-de 1-nji iýuldan başlap, bahasy 10 müň ýuandan (takmynan 1460 dollardan) az bolan söwdalaryň salgyt hatlary örän ýeňil – saýlama usulda barlanar. Ondan gymmat harytlar bolsa, ozalkysy ýaly, doly gözegçilikden geçer. Şonuň bilen bir wagtda, dükanlarda salgyt puluny şol pursatda yzyna alan syýahatçylaryň ýurtda galyp bilmek möhleti-de 28 güne çenli uzaldylar.
Mundan başga-da, Hytaýda geçirilýän iň uly halkara sergilerde we ýarmarkalarda hem syýahatçylar üçin aýratyn «Tax Free» hyzmat zolaklary dörediler.
Şunlukda Hytaýa söwda maksady bilen gidýän daşary ýurtly syýahatçylar indi harytlaryň salgyt puluny hiç hili kagyzsyz we nobatsyz, örän tiz we ýeňil görnüşde yzyna alyp bilerler.
