Geçen hepdede Türkmenistanyň Döwlet haryt-çig mal biržasynyň söwdalarynda umumy bahasy 13 million 66 müň ABŞ dollaryndan gowrak bolan 19 sany geleşik hasaba alyndy.
Daşary ýurt puluna Özbegistanyň, Birleşen Arap Emirlikleriniň we Owganystanyň işewürleri «Türkmengaz» we «Türkmenhimiýa» döwlet konsernleriniň tehnologik desgalarynda öndürilen suwuklandyrylan gazy, şeýle hem «Türkmenhimiýa» döwlet konserniniň kükürtsizleşdirilen dizel fraksiýasyny satyn aldy.
Mundan başga-da, Gonkongyň, Özbegistanyň, BAE-niň, Türkiýäniň we Gyrgyzystanyň telekeçileri ýorgan-düşek daşlyklarynyň toplumlaryny, pagta ýagynyň galyndysyndaky ýag kislotalaryny, buýan köküniň gury ekstraktyny, çig ýüpegi we pagta ýüplügini satyn aldy.
Içki bazarda türkmen telekeçileri binýatlyk ýagy, çig matany, arassalanan pagta ýagyny we bugdaý ununy satyn aldy. Milli pulda geçirilen geleşikleriň umumy möçberi 118 million 350 müň manada barabar boldy.
