Aşgabatda Ählumumy saglygy goraýyşda diplomatiýa meseleleri boýunça ýokary derejedäki Dialog açyldy

16-njy fewralda Aşgabadyň «Ýyldyz» myhmanhanasynda Ählumumy saglygy goraýyşda diplomatiýa meseleleri boýunça ýokary derejedäki Dialogyň açylyş dabarasy boldy. Forum Türkmenistanyň Hökümeti tarapyndan Bütindünýä Saglygy Goraýyş Guramasy (BSGG) bilen bilelikde guraldy.
Bu çäre ýurtlaryň köpçülikleýin howpsuzlyk we saglygy goraýyş ulgamynyň durnukly ösüşi ugrundaky tagallalaryny utgaşdyrmak üçin bitewi platformany döretmäge gönükdirilendir. Dialoga Türkmenistanyň döwlet edaralarynyň, Birleşen Milletler Guramasynyň, BSGG-niň, Garaşsyz Döwletleriň Arkalaşygynyň (GDA), şeýle hem Merkezi Aziýa ýurtlarynyň we Ermenistanyň degişli edaralarynyň ýolbaşçylary hem-de wekilleri gatnaşdy.
Çykyşlaryň dowamynda esasy üns köpçülikleýin howpsuzlyk, saglygy goraýşy ösdürmek, tejribe alyşmak we lukmançylyk ulgamynda hünärmenleri taýýarlamak meselelerine gönükdirildi. Türkmenistanyň daşary işler ministriniň orunbasary M. Bäşimowa bu Dialogyň geçirilmeginiň Arkalaşykda saglyk ýyly diýlip yglan edilen Türkmenistanyň GDA-da başlyklyk edýän ýyly bilen gabat gelýändigini belledi.
Gatnaşyjylar sebitleýin dialogyň Aşgabatda geçirilmeginiň simwoliki ähmiýetini nygtady hem-de Türkmenistanyň Merkezi Aziýa ýurtlarynyň hyzmatdaşlygyny we BSGG bilen özara gatnaşyklary yzygiderli goldaýandygyny aýtdy. Pikir alyşmalar bu formatyň ýurtlaryň we halkara guramalarynyň arasynda ynamy berkitmäge, hyzmatdaşlygy ösdürmäge we tejribe alyşmaga ýardam etjekdigini görkezdi.