Türkmenistanyň hemişelik Bitaraplygynyň 30 ýyllyk baýramynyň bellenilýän günlerinde daşary ýurtlaryň raýatlaryna we Türkmenistanyň hormatly ýaşulularyna «Türkmenistanyň Bitaraplygynyň 30 ýyllygyna» atly ýubileý medalyny we ýadygärlik kümüş nyşanyny gowşurmak dabarasy boldy.
Dabara Türkmenistanyň Halk Maslahatynyň Başlygy Gurbanguly Berdimuhamedowyň gatnaşmagynda geçirildi.
Koreýa Respublikasynyň Bütindünýä innowasiýalary öwreniş institutynyň başlygy Kim Çžin Pýo sylaglanyldy. Ol ýokary sylag üçin türkmen tarapyna tüýs ýürekden hoşallyk bildirdi. BMG-niň Baş sekretarynyň Ýörite wekili, BMG-niň Merkezi Aziýa üçin öňüni alyş diplomatiýasy boýunça sebit merkeziniň ýolbaşçysy Kaha Imnadze ýubileý medalyny we degişli nyşany hormat bilen kabul edip, bu baýramçylygyň öz durmuşynda ýatda galyjy waka öwrülendigini nygtady. Türkiýäniň ýurdumyz bilen köp ýyllaryň dowamynda netijeli hyzmatdaşlyk edýän “Çalyk Holding” kompaniýalar toparynyň dolandyryjylar geňeşiniň başlygy Ahmet Çalyk “Türkmenistanyň Bitaraplygynyň 30 ýyllygyna” atly ýubileý medalynyň we degişli nyşanyň gowşurylmagynyň özi üçin aýratyn hormatdygyny belledi. Germaniýa Federatiw Respublikasynyň Lýudwig Maksimilian uniwersitet klinikalar toplumynyň Fýurstenfeldbruk ylmy-gözleg klinikasynyň umumy we wisseral hirurgiýa klinikasynyň baş lukmany Şpelsberg Fritz Wilhelm Wolfgang sylaglary özüne bildirilen hormat hökmünde kabul edýändigini aýdyp, Gahryman Arkadagymyza tüýs ýürekden çykýan hoşallygyny beýan etdi.
“Türkmenistanyň Bitaraplygynyň 30 ýyllygyna” atly ýubileý medalyna we degişli nyşana mynasyp bolan daşary ýurt raýatlary taryhy ähmiýetli halkara çärelere gatnaşmaga iberilen çakylyk we özlerine bildirilen ýokary hormat üçin hormatly Prezidentimize hem-de Milli Liderimize sagbolsun aýtdylar.
Soňra çäre ýurdumyzyň hormatly ýaşulularyna “Türkmenistanyň Bitaraplygynyň 30 ýyllygyna” atly ýubileý medalyny we ýadygärlik kümüş nyşanyny gowşurmak dabarasy bilen dowam etdi.
