Russiýada ilkinji gezek duýgurlygy boýunça PZR bilen deňeşdirip bolýan B gepatitini anyklaýan çalt test resmi taýdan hasaba alyndy. Bu barada Rospotrebnadzor (RF) habar berdi.
Bu synag Rospotrebnadzoryň Merkezi epidemiologiýa ylmy-barlag institutynyň alymlary tarapyndan LAMP (Loop mediated isothermal amplification) tehnologiýasy esasynda işlendi. Täze usul wirusy bary-ýogy 25–30 minutda ýüze çykarmaga mümkinçilik berýär, bu bolsa adaty anyklaýyş usullary bilen deňeşdirilende has çalt.
Test B gepatitini başlangyç tapgyrlarda takyk kesgitlemäge mümkinçilik berýär. Bu bolsa wagtynda bejergi geçirmäge we alnyp barylýan epidemiologik çäreleriň netijeliligini ýokarlandyrmaga ýardam edýär.
B gepatiti bagry zeperleýän ýokanç kesel bolup, wagtynda bejerilmese sirroza ýa-da rak öýjükleriniň döremegine getirip biler. Kesel gan we beýleki beden suwuklyklary arkaly ýokuşýar, immuniteti gowşak adamlar we çagalar üçin has howpludyr.
