Soňky ýüz ýylda dünýäniň köp böleginde zenanlaryň iş şertleri düýpli üýtgedi – häzirki günde olar giň mümkinçiliklere we hukuklara eýe bolup, köp kärde zähmet çekip bilýär. Şeýle-de bolsa, Deloitte Global Women @ Work 2025 gözleginiň görkezişi ýaly, deňlik barada gürlemekden entek ir. Pikir soraşma gatnaşan 15 ýurtdan 7500 zenanyň arasynda diňe 5%-i häzirki iş ýerinde bäş ýyldan uzak galmagy meýilleşdirýändigini aýtdy.
Zenanlara laýyk gelýän işi gözlemekde kömek etmek maksady bilen Forbes žurnaly olar üçin dünýäniň iň gowy kompaniýalarynyň täze reýtingini hödürledi. Gözlege transmilli korporasiýalarda işleýän 36 ýurtdan 120 müň respondent gatnaşdy.
Sanaw düzülende bilermenler kompaniýalara birnäçe ugurda baha berdi: iş şerti, iş bilen şahsy durmuşyň deňagramlylygy, zähmet hakynyň derejesi, ýeňillikleriň bolmagy, karýera ösüşi üçin mümkinçilikler we toparda umumy atmosfera. Şeýle-de, gender deňligi, jynsparazlygyň bolmazlygy, kompaniýanyň abraýy we onuň sosial başlangyçlary göz öňünde tutuldy.
Ahyrky sanawa iň köp bal gazanan 400 iş beriji girdi. Öňdebaryjylaryň onlugy şeýle görnüşde:
- Microsoft (ABŞ, programma üpjünçiligi)
- Roche Holding (Şweýsariýa, derman serişdeleri we biotehnologiýa)
- National Bank of Canada (Kanada, maliýe hyzmatlary)
- Hewlett Packard Enterprise (ABŞ, IT)
- IKEA (Niderlandlar, söwda)
- L’Oréal (Fransiýa, parfýumeriýa we kosmetika)
- Deloitte (Beýik Britaniýa, konsalting)
- Nike (ABŞ, egin-eşik we sport esbaplary)
- Netflix (ABŞ, media)
- Apple (ABŞ, elektronika).
