Apple kompaniýasynyň baş direktory Tim Kuk ýat we saklaýjy çipleriň bahasynyň ýokarlanmagy sebäpli kompaniýanyň önümleriniň gymmatlajakdygyny duýdurdy.
«Gymmatlama — gutulgysyz. Biz çykdajylaryň artmagyny peseltmek we müşderilerimizi bu gymmatlamadan goramak üçin elimizde baryny edýäris, ýöne ýagdaý durnuksyz bolup başlady» – diýip, Kuk «The Wall Street Journal» neşirine beren interwýusynda belledi.
Şol bir wagtyň özünde, ol anyk haýsy enjamlaryň bahasynyň galjakdygyny we munuň haçan bolup geçjekdigini aýtmady.
«TechInsights» barlag kompaniýasynyň maglumatlaryna görä, eger düzüm bölekleriniň bahasynyň artmagy dolulygyna sarp edijileriň üstüne ýüklenilse, onda indiki iPhone Pro modeli özünden öňkülerden, takmynan, 270 dollar gymmat bolup biler.
Kuk emeli aň tehnologiýalarynyň ösmegi netijesinde ýokary islegden peýdalanýan DRAM ýat modullarynyň bahasynyň artmagyna aýratyn ünsi çekdi.
«Sarp ediş harytlary üçin ýadyň bahasynyň we hödürlemäniň kadaly derejelere dolanmagy biz üçin diýseň zerur. Esasy mesele şundadyr» – diýip, ol nygtady.
Kompaniýanyň ýolbaşçysy Apple-iň ýat çipleriniň üpjünçiligini giňeltmek üçin özüniň maliýe serişdelerini ulanmaga taýýardygyny, ýöne şeýle komponentleriň şahsy önümçiligini ýola goýmagy meýilleşdirmeýändigini habar berdi.
Ýatlap geçsek, Tim Kuk 2026-njy ýylyň 1-nji sentýabrynda Apple kompaniýasynyň baş direktory wezipesinden gider. Onuň ornuny Jon Ternus eýelär, Kukuň özi bolsa kompaniýanyň ýerine ýetiriji başlygy wezipesine geçer.
