Hytaýyň tehnologiýa ägirdi Alibaba geçen ýyl bilen deňeşdireniňde, kompaniýanyň arassa peýdasynyň 84% aşak düşüp, 5,1 milliard ýuana (750,9 million dollar) çenli azalandygyny mälim etdi. Emma muňa garamazdan, emeli aň tehnologiýalaryna bolan uly isleg sebäpli kompaniýanyň «bulut» bölüminiň girdejisi 38% ýokarlandy.
EBITA – göterimler, salgytlar we amortizasiýa tutumlary aýrylmazdan ozalky düzedilen peýda görkezijisidir.
Birinji çärýekde peýdanyň peselmegi, esasan, onlaýn söwda we emeli aň düzümlerine goýlan ägirt uly maýa goýumlary bilen baglanyşyklydyr. Kompaniýanyň baş direktory Eddi Wu Alibaba-nyň bu goýumlaryň netijesini ýakyn 3-5 ýylyň içinde görjekdigine ynanýandygyny aýtdy.
Onuň sözlerine görä, emeli aňa bolan isleg şeýle bir ýokary welin, häzirki wagtda kompaniýa ozalky çak edilişinden has köp hasaplama güýjüne mätäç. Şol sebäpli Alibaba maglumat merkezlerine, ýarymgeçirijilere we «Qwen» atly öz emeli aň modellerine yzygiderli maýa goýmagy dowam etdirýär.
«Bulut» işewürligi össe-de, maýadarlar «dessine söwda» (harytlary bir sagatdan-da az wagtda eltip bermek) ugruna sarp edilýän çykdajylara şübheli garaýarlar. Bu ugra goýlan maýalar sebäpli Hytaýdaky onlaýn söwda bölüminiň sap peýdasy 40% azaldy, ýöne müşderileri dolandyrmakdan gelýän girdeji 1% ösüş görkezdi.
Şol bir wagtyň özünde, çalt eltip berme hyzmatyndan gelýän girdeji 57%, Hytaýdaky onlaýn söwdanyň umumy girdejisi bolsa 6% ýokarlandy.
Kompaniýanyň «Cloud Intelligence Group» girdejisi 41,6 milliard ýuana (6,1 milliard dollar) ýetdi. Maliýe direktory Tobi Sýu emeli aň önümlerinden gelýän girdejiniň eýýäm 11 çärýek bäri yzygiderli üç belgili sanlar bilen (ýagny azyndan 100% we ondan köp) ösýändigini habar berdi.
Şeýle hem, kompaniýa meşhur «Taobao» söwda platformasy üçin «Qwen» atly sesli emeli aň kömekçisini işe girizýändigini-de yglan etdi.
