Soňky 5 ýylyň dowamynda Ýewropada aşa ýokary girdejili adamlaryň sany 25 göterim artdy. Knight Frank Wealth Report-uň täze hasabatyna görä, Ýewropa yklymynda baýlygy 30 million dollardan geçýän 183 953 adam ýaşaýar.
Bu «tüçjar baýlar klubunyň» her gün 20-den gowrak täze agza bilen (ýylda takmynan 7 500 adam) köpelýändigini aňladýar. Dünýä derejesinde bolsa bu görkeziji has ýokarydyr. Oňa görä, her gün dünýäde 89 sany täze multimillioner peýda bolýar we olaryň umumy sany 713 626 adama ýetdi.
Ýewropadaky tüçjar baý raýatlaryň dörtden birinden gowragy üç döwletde — Germaniýada, Beýik Britaniýada we Fransiýada jemlenendir.
Germaniýada 2026-njy ýylda 38 215 adamyň 30 million dollardan gowrak maýasy bar, bu bäş ýyl ozalky görkezijiden 9 273 adam köpdür. Ýurtda her gün ortaça bäş adam bu maliýe sepgidine ýetýär.
Beýik Britaniýada şeýle raýatlaryň sany 27 876 (günde +1,6), Fransiýada — 21 518 (günde +2,1), Şweýsariýada — 17 692 (günde +2,7), Italiýada — 15 433 (günde +1,6) we Ispaniýada — 9 185 (günde +1,5) adama deňdir.
Şweýsariýa we Türkiýe ÝB-niň çäginden daşarda baýlarynyň sany günde azyndan bir adam köpelýän ýeke-täk ýurtlardyr. Polşa (0,9), Çehiýa (0,5) ýa-da Niderlandlar (0,3) ýaly döwletlerde günlük artma has pesdir.
Dünýäde bolsa ABŞ ägirt uly tapawut bilen öňdeligi saklaýar. Häzir ol ýerde 251 352 tüçjar baý adam ýaşaýar. Amerikanyň «baýlar kluby» her gün 37 agza bilen köpelýär (her 90 minutda bir täze multimillioner), bu bolsa tutuş Ýewropanyň görkezijisinden iki esse diýen ýaly köpdür. Ikinji orunda Hytaý (121 677 adam, günde +12,5) durýar. Şeýle hem iň baý onluga Hindistan (günde +4,2) we Awstraliýa (günde +2,2) girýär.
Tüçjar baýlaryň sanynyň tiz artmagy Ýewropadaky düýpli emläk deňsizliginiň täsirinde bolup geçýär. Ýewropa Merkezi bankynyň hasaplamasynda ýewrosebitlerde hojalyklaryň ortaça arassa baýlygy 123 500 ýewro diýlip bellenildi. Emma bu ortaça bahanyň astynda uly tapawut gizlenýär. Ýagny ilatyň aşaky 20 göteriminde bu görkeziji bary-ýogy 2 000 ýewro bolsa, ýokarky 20 göteriminde 1 million ýewrodan geçýär.
Döwletleriň arasynda hem uly deňsizlik bar: bir uly ýaşly adama düşýän ortaça baýlyk Türkiýede 29 923 ýewrodan, Şweýsariýada 634 584 ýewro çenli üýtgeýär, ýagny tapawut takmynan 22 esse.
Bilermenler multimillionerleriň sanynyň artmagy ilatyň umumy abadançylygyny däl, eýsem maýanyň diňe birnäçe adamyň elindedigini aňladýar diýip düşündirýärler.
