Dünýäniň wideooýun bazary 2025-nji ýylyň jemleri boýunça taryhda ilkinji gezek 200 milliard dollar çäginden geçdi.
Newzoo seljeriş kompaniýasynyň berýän maglumatlaryna görä, ulgamyň umumy girdejisi 201,6 milliard dollara ýetdi, bu bolsa öňki ýyl bilen deňeşdirilende 9,1%) köpdür.
Iň ýokary ösüş depginini kompýuter (PK) oýunlarynyň bazary görkezdi. Onuň girdejisi 12% ýokarlanyp, 43,6 milliard dollara ýetdi. Seljerijiler bu ösüşiň aýratyn bir sany uly taslamalaryň hasabyna däl-de, eýsem köp sanly premium derejeli täze oýunlaryň çykarylmagy netijesinde üpjün edilendigini belleýärler.
Mobil oýunlar pudagy ulgamyň iň uly bölegi bolmagynda galdy. Onuň göwrümi 113,3 milliard dollara deň bolup, öňki ýylyň gysyndan 10,7% köp boldy. Şunlukda, oýunlary ýüklemeleriň sanynyň azalmagyna garamazdan girdejiler ýokarlanmagyny dowam etdirdi.
Konsol oýunlarynyň bazary 2,8% ösüş görkezip, 44,7 milliard dollar girdeji getirdi. Bu bölegiň ösmegine doly göwrümli oýunlaryň satylmagy we abunalyk gulluklary goldaw berdi. Şol bir wagtda, hyzmat görnüşindäki oýunlardan gelýän girdejileriň azalmagy we «Nintendo» ekoulgamynyň biraz pes görkezijileri umumy netijä bökdençlik döretdi.
«Counter-Strike 2» we «Roblox» oýunlarynyň meşhurlugy netijesinde, oýunçylaryň kompýuter oýunlarynyň içindäki satyn almalara sarp eden pullary 9,1% ýokarlandy. Konsol böleginde bolsa bu görkeziji 4,6% peseldi, seljerijiler muny «Fortnite» we «Call of Duty» oýunlarynyň märekesiniň işjeňliginiň peselmegi bilen baglanyşdyrýarlar.
Ösüş dünýäniň ähli sebitlerinde hasaba alyndy. Aziýa-Ýuwaş umman sebiti dünýä girdejisiniň 47%-ini eýeläp, iň uly bazar bolmagynda galýar. Newzoo kompaniýasynyň çaklamasyna görä, 2028-nji ýyla çenli dünýäniň oýun pudagynyň göwrümi 234,4 milliard dollara ýetip biler.
