Saglygy goraýyş we derman senagaty ministrligi Aşgabat şäherinde 500 orunlyk köpugurly hassahanany gurmak barada “Gap Inşaat Ýatyrym we Dyş Tijaret A.Ş.” türk kompaniýasy bilen şertnama baglaşar. Munuň üçin ygtyýar berýän resminama Prezident Serdar Berdimuhamedow gol çekdi.
Resminama laýyklykda, türk kompaniýasy hassahananyň taslamasyny düzer hem-de ony döwrebap lukmançylyk enjamlary, ätiýaçlyk şaýlary we sarp ediş serişdeleri bilen üpjün eder. Şeýle hem hünärmenleri ýörite taýýarlar.
Gurluşyk işlerine 2025-nji ýylyň oktýabr aýynda başlamak we köpugurly hassahanany 2029-njy ýylyň fewral aýynda ulanmaga doly taýýar edip tabşyrmak bellenildi.
