17-nji sentýabrda Türkmenistanyň Rumyniýadaky ilçihanasy «Türkmenistanyň hemişelik bitaraplyk ýoly: parahatçylyga we durnuklylyga 30 ýyllyk ygrarlylyk» atly halkara maslahatyny geçirdi. Maslahat Buharest şäherindäki Milli Ylym we Tehnologiýa Uniwersitetiniň Politehnika okuw merkezinde guraldy diýip, Türkmenistanyň DIM-nde habar berdiler.
Maslahata diplomatlar, Rumyniýanyň döwlet edaralarynyň wekilleri, ylmy jemgyýetçiliginiň agzalary hem-de talyp ýaşlar gatnaşdylar.
Çykyş edenler häzirki döwrüň şertlerinde bitaraplyk temasynyň ähmiýetini, onuň parahatçylygy, durnuklylygy we durnukly ösüşi berkitmekdäki ornuny nygtadylar.
Maslahatda giriş sözi bilen uniwersitetiň rektory, professor Mihneýa Kostoiu çykyş edip, Türkmenistanyň bitaraplyk hukuk derejesiniň hem-de onuň parahatçylyk söýüjilikli syýasatynyň ähmiýetini belläp geçdi. Türkmenistanyň Rumyniýadaky ilçisi A.Annaýew bitaraplygyň Türkmenistanyň daşary syýasatynyň binýatlyk ýörelgesidigini hem-de BMG-niň Baş Assambleýasy tarapyndan üç gezek tassyklanandygyny nygtady.
Türkmen-rumyn gatnaşyklarynyň ösdürilmegine, şol sanda Hazar deňzi – Gara deňiz ulag geçelgesi taslamasyna, şeýle hem energetika, sanly tehnologiýalar we ekologiýa ugurlarynda hyzmatdaşlygyň geljekki mümkinçiliklerine aýratyn üns berildi.
Maslahat milli mirasymyzyň baýlygyny myhmanlaryň has ýakyndan tanamagyna mümkinçilik döreden sergi we milli tagamlaryň hödürlenmegi bilen jemlendi.
