Ahal welaýatynyň Gökdepe etrabynda «Türkmen aýna önümleri» kärhanasynyň täze önümhanasy dabaraly ýagdaýda işe girizildi. Täze önümhananyň kuwwatlylygy bir gije-gündizde 100 tonna çüýşe önümlerini öndürmäge niýetlenen diýip, «Neýtralnyý Türkmenistan» gazeti habar berýär.
Açylyş dabarasyna Türkmenistanyň Prezidenti Serdar Berdimuhamedow gatnaşdy.
Şeýle-de çärä Mejlisiň wekilleri, Hökümet agzalary, Senagat we gurluşyk önümçiligi ministrliginiň wekilleri, ýaşulular we ýaşlar gatnaşdy.
Täze önümçilik gurluşyk materiallaryna bolan içerki islegleri kanagatlandyrmaga, ýurduň eksport mümkinçiligini ýokarlandyrmaga we goşmaça iş orunlaryny döretmäge gönükdirilendir. Bu desganyň önümçiliginde dünýäniň öňdebaryjy kompaniýalarynyň ýokary hilli enjamlary ornaşdyryldy. Munuň özi ýurdumyzyň ykdysadyýetiniň ýokary hilli ýerli önümlere bolan isleglerini kanagatlandyrmaga, pudagyň eksport mümkinçiliklerini ýokarlandyrmaga, öndürilýän önümleriň mukdaryny artdyrmaga, olaryň görnüşlerini giňeltmäge ýardam eder.
