Milliarder Ilon Maskyň X we xAI kompaniýalary Apple we OpenAI (ChatGPT çat-botuny dörediji) kompaniýalaryna garşy şikaýat arzasy bilen Tehasdaky kazyýete ýüz tutdy. Bu barada 25-nji awgustda Bloomberg agentligi habar berdi.
Beýanda Apple bilen OpenAI-iň arasyndaky aýratyn şertnamanyň ChatGPT-ni iPhone-a goşulan ýeke-täk çat-bota öwrendigi aýdylýar. Şikaýatçylaryň pikiriçe, bu bäsdeşligi çäklendirýär we tehnologiýanyň ösmegine päsgel berýär, şeýle-de ulanyjylary saýlamak mümkinçiliginden mahrum edýär. Şunuň bilen baglylykda Maskyň kompaniýalary öwez tölegi hökmünde milliardlarça dollar talap edýär.
OpenAI-iň wekili Bloomberg bilen söhbetdeşlikde şikaýat arzasynyň “Maskyň yzygiderli yzarlamak tejribesini” görkezýändigini aýtdy. Apple teswir bermekden ýüz öwürdi.
Apple 2024-nji ýylda ChatGPT-ni Apple Intelligence emeli aň ulgamyna goşmak barada OpenAI bilen şertnama baglaşdy. 2025-nji ýylyň maý aýynda Apple-iň uly wise-prezidenti Eddi Kýu şertnamanyň eksklýuziw däldigini we kompaniýanyň islän ýagdaýynda başga çözgütleri-de ulanyp biljekdigini belledi.
Bloomberg Maskyň OpenAI-iň ýolbaşçysy Sem Altman bilen köpden bäri dawalaşýandygyny ýatladýar. 2015-nji ýylda olar bilelikde OpenAI-i döretmäge gatnaşdy, ýöne 2018-nji ýylda Mask müdirler geňeşini terk etdi.
11-nji awgustda Mask X sosial ulgamynda Apple-iň monopoliýa garşy kanuny bozýandygyny ýazdy, sebäbi OpenAI-den başga emeli aň bilen meşgullanýan ýekeje kompaniýa-da App Store-da birinji orna çykyp bilenok. Muňa jogap hökmünde Altman Maskyň “X-i öz bähbitleri we kompaniýalarynyň bähbitleri üçin ulanyp”, bäsdeşlerine we halamaýan adamlaryna zyýan ýetirýändigini” aýtdy.
Maskyň xAI kompaniýasy öz Grok çat-botuny işläp taýýarlaýar.
