Türkmenistany, Özbegistany we Gazagystany birleşdirýän täze halkalaýyn syýahatçylyk ugry döredildi. Serhetara syýahatçylygy ösdürmäge gönükdirilen bu taslama ÝUNESKO-nyň Bütindünýä mirasynyň sanawyna girizilen 15-den gowrak desgany öz içine alýar. Bu barada Özbegistanyň Ekologiýa, daşky gurşawy goramak we howanyň üýtgemegi ministrliginiň Syýahatçylyk boýunça komitetiniň metbugat gullugy habar berdi.
Täze ugur Merkezi Aziýanyň medeniýetine, taryhyna, sungatyna we tebigatyna gyzyklanýan syýahatçylara niýetlenendir. Ol syýahatçylary sebitde saklanyp galan baý miras bilen tanyşdyrýar.
Ugruň esasy nokatlary:
Türkmenistan
- Gadymy Merw – Beýik Ýüpek ýolundaky iň iri arheologik merkezleriň biri.
- "Derweze" krateri – özboluşly tebigy hadysa.
- Köneürgenç – Horezm döwletiniň gadymy paýtagty, ÝUNESKO-nyň sanawynda bar.
Özbegistan (Horezm we Garagalpagystan)
- Içan-Gala we Daşan-Gala – Hywanyň taryhy bölekleri.
- Nukusdaky I.W.Sawitskiý muzeýi – rus awangardynyň uly kolleksiýasy.
- Gadymy galalar: Gyzył-gala, Çilpik-gala, Toprak-gala, Aýaz-gala.
Gazagystan
- Toryş jülgesi, Bozžyra jülgesi we Şerkala dagy – täsin landşaftly tebigy ýerler.
- Şakpak-Ata kümmeti – orta asyr binagärlik ýadygärligi.
Ugur ýörite edaralar we hususy pudaklar bilen bilelikde taýýarlanyldy. Ol syýahatçylara amatlylyk we baý medeni mazmun hödürleýär. Taslama birnäçe ugurlary birleşdirýär:
- gastronomik – milli tagamlardan datmak,
- ekologik – tebigatyň täsin landşaftlarynda dynç almak,
- etnografik – halk däp-dessurlary, ýörelgeleri we senetleri bilen tanyşmak,
- zyýarat – mukaddes we ruhy-taryhy ýerleri görmek.
Ugruň kartasyny şu salgydan göçürip almak mümkin.
