5-nji awgustda Türkmenistanyň daşary işler ministri Raşid Meredow Gruziýanyň daşary işler ministri Maka Boçorişwili bilen duşuşyk geçirdi. Bu barada Türkmenistanyň DIM-nde habar berdiler.
Duşuşygyň dowamynda ikitaraplaýyn saparlaryň tejribesini iň ýokary we ýokary derejelerde dowam etdirmegiň, şeýle hem iki ýurduň daşary işler ministrlikleriniň arasynda yzygiderli geňeşmeleriň geçirilmeginiň ähmiýeti bellenildi.
Ministrler halkara guramalarynyň çägindäki syýasy dialogyň we konstruktiw hyzmatdaşlygyň ýokary derejesini bellediler. BMG-niň Deňze çykalgasy bolmadyk ösüp barýan döwletler boýunça üçünji maslahatyna ýokary derejeli Gruziýanyň wekiliýetiniň gatnaşmagy BMG-niň çägindäki ýakyn hyzmatdaşlygyň ýene bir subutnamasydyr.
Daşary syýasat edaralarynyň ýolbaşçylary söwda- ykdysady gatnaşyklary, şol sanda ulag, logistika we energetika ugurlaryny ösdürmegiň mümkinçiliklerini ara alyp maslahatlaşdylar.
Medeni-ynsanperwer hyzmatdaşlygyň ähmiýeti aýratyn nygtaldy.
Taraplar hormat we ynanyşmak ýörelgelerine esaslanýan netijeli hyzmatdaşlygy dowam etdirmek isleýändiklerini mälim etdiler.
