Türkmenistan Atom energiýasy boýunça halkara agentligi bilen (MAGATE) 2025–2029-njy ýyllar üçin Atom energiýasy boýunça halkara agentliginiň Türkmenistan üçin ýurt boýunça çarçuwaly maksatnamasynyň taslamasynyň ylalaşylmagyny ara alyp maslahatlaşdy. Degişli gepleşikler 4-nji awgustda «Awaza» milli syýahatçylyk zolagynyň «Berkarar» myhmanhanasynda Türkmenistanyň daşary işler ministriniň orunbasary Ahmet Gurbanow bilen Atom energiýasy boýunça halkara agentliginiň (MAGATE) Baş direktorynyň orunbasary Lýu Huanyň arasynda geçirildi.
Bellenilişi ýaly ýakyn wagtda bu resminama gol çekmäge özara gyzyklanma bildirildi.
Duşuşykda şeýle hem hereket edýän maksatnamalara we taslamalara, hususan-da saglyk pudagynda MAGATE-niň hünärmen we tehniki mümkinçiliklerini çekmäge aýratyn üns berildi.
MAGATE-niň Baş direktorynyň orunbasary BMG-niň Deňze çykalgasy bolmadyk ösüp barýan döwletler boýunça üçünji maslahatynyň ähmiýetini belläp, ýokary derejeli guramaçylyk we myhmansöýerlik üçin türkmen tarapyna minnetdarlyk bildirdi.
