28-nji iýulda Türkmenistanyň wise-premýeri, daşary işler ministri Raşid Meredow bilen Özbegistanyň daşary işler ministri Bahtiýor Saidowyň arasynda telefon arkaly söhbetdeşlik geçirildi.
Özbegistanyň DIM-niň habar bermegine görä, taraplar iki ýurduň arasyndaky strategik hyzmatdaşlygy berkitmek, hyzmatdaşlygyň täze ugurlaryny ösdürmek hem-de öňde boljak sebit we halkara çäreleri ara alyp maslahatlaşdylar.
Soňky ýyllarda iki ýurduň gatnaşyklarynyň ýokary derejä çykandygy, bu işde ýokary derejedäki yzygiderli duşuşyklaryň möhüm orun eýeleýändigi bellenildi. Edaralaryň arasyndaky gatnaşyklaryň pugtalandyrylýandygy, haryt dolanyşygynyň we ýük daşamalarynyň artýandygy, şeýle hem bilelikdäki taslamalaryň durmuşa geçirilýändigi nygtaldy. Şu işleriň çäginde serhetýaka «Şawat–Daşoguz» söwda zolagynyň gurluşygynyň tamamlaýjy tapgyryna ýetendigi aýdyldy.
Taraplar şu ýylyň sentýabr aýynda Daşkentde geçiriljek Merkezi Aziýa döwletleriniň Baştutanlarynyň ýedinji Konsultatiw duşuşygyna taýýarlyk görmek boýunça tagallalary hem utgaşdyrýarlar. Mundan başga-da, bilelikdäki Hökümetara toparynyň nobatdaky mejlisini, sebitara forumy we Işewürler geňeşini geçirmek meýilleşdirilýär.
