16-njy iýulda türkmen halkynyň Milli Lideri Azerbaýjana saparynyň çäklerinde “Sea Breeze” dynç alyş toplumyna baryp gördi. Bu ýerde Gurbanguly Berdimuhamedowy Azerbaýjanyň Prezidenti Ilham Aliýew we “Sea Breeze” toplumynyň esaslandyryjysy Emin Agalarow garşyladylar.
Bu ýerde türkmen halkynyň Milli Liderine şekil taslamalarynyň üsti bilen agzalan dynç alyş toplumy barada maglumat berildi.
E.Agalarowyň aýtmagyna görä, häzirki güne çenli "Sea Breeze" toplumynyň çäginde ýaşaýyş we söwda maksatly 3 million inedördül metrden gowrak emläk ulanylmaga berildi, 500-den gowrak desgalar guruldy. Sebitde takmynan 20 müň adam ýaşaýar.
Häzirki wagtda meýilnamada — meýdany 50 gektar bolan, ýarymaý görnüşindäki emeli ýarymadanyň döredilmegi we 2028-nji ýyla çenli toplumda ýaşaýjylaryň sanynyň 50 müňe ýetirilmegi bar. Taslamanyň ähli tapgyrlary amala aşyrylandan soň, "Sea Breeze" 500 müň ýaşaýjyny kabul edip biler.
Ýaşaýyş we dynç alyş üçin amatly şertleri üpjün etmek maksady bilen ösen infrastruktura döredildi: mekdep, çagalar bagy, hassahana, dynç alyş zolaklary, seýilgähler we kenar ýakasy guruldy. 10 million töweregi ösümlik we agaç ekildi. Ýaşyl zolaklaryň umumy meýdany 300 gektara ýetýär. Şol bir wagtda toplumyň umumy meýdany 500 gektary düzýär. "Sea Breeze-iň" esasy desgalary kenaryň ugrunda ýerleşýär.
Taslama goýlan umumy maýa goýumlarynyň möçberi 3 milliard dollara ýetdi. Indiki bäş ýylyň dowamynda goşmaça 10 milliard dollardan gowrak maýa goýum çekmek meýilleşdirilýär.
