Türkmen halkynyň Milli Lideri Gurbanguly Berdimuhamedow Prezident Serdar Berdimuhamedowy Aşgabat şäheriniň güni hem-de Türkmen halysynyň baýramy mynasybetli türkmen halkynyň we Türkmenistanyň Halk Maslahatynyň adyndan gutlady.
"Aşgabat şäheriniň güni mynasybetli «Ak şäherim Aşgabat» atly XXIV köpugurly halkara serginiň hem-de maslahatyň guralmagy, ýurdumyzda okuw ýylynyň tamamlanmagy mynasybetli «Soňky jaň» dabarasynyň geçirilmegi we Türkmen halysynyň baýramynyň bu ajaýyp baýram bilen gabat gelmegi şanly senäniň ähmiýetini has-da artdyrýar. Şeýle ajaýyp günde gujagy gül çemenlerinden doly uçurymlaryň säher bilen mukaddesliklerimize tagzym etmekleri milli buýsanjyň belentliginden, bagtyýar geljege ynamyň berkliginden, Watana çäksiz söýginiň egsilmezliginden nyşandyr" diýip, türkmen halkynyň Milli Lideri belleýär.
Gutlagda bellenilişi ýaly, "Aşgabadyň dünýäde ak mermerli binalaryň iň köp jemlenen şäheri hökmünde Ginnesiň rekordlar kitabyna, «Dizaýn» ugry boýunça ÝUNESKO-nyň döredijilik şäherleriniň toruna girizilmegi, Syýahatçylyk şäherleriniň bütindünýä federasiýasynyň agzasy bolmagy, BMG-niň Ýewropa ykdysady komissiýasynyň yglan eden «Şäherlerdäki baglar» atly başlangyjyna bag ekmek çäreleri arkaly goldawy we oňa goşan goşandy üçin halkara güwänamanyň berilmegi, şol sanda Garaşsyz Döwletleriň Arkalaşygy tarapyndan Aşgabat şäherini «Arkalaşygyň täze sport mümkinçilikleriniň şäheri» diýip yglan etmek hakyndaky Çözgüdiň biragyzdan kabul edilmegi ýurdumyzyň halkara abraýyny has-da belende göterýär".
