Arheologlar Germaniýada Rim imperiýasy döwrüniň atlarynyň mazarlygyny tapdy. Bu barada The Independent gazeti habar berýär.
Taryhçylar bu jandarlaryň ala diýlip atlandyrylan II asyryň atly goşun bölümine gulluk edendigini anyklady. Ol adaty goşundan uly bolup, 5400-den gowrak adamy öz içine alypdyr. Bölüm häzirkizaman günorta-günbatar Germaniýanyň çäginde hereket edipdir.
Rim imperiýasynyň gülläp ösen döwründe häzirki Ştutgartyň golaýyndaky sebit möhüm harby merkezine öwrülipdir. Ol ýerde 700-den gowrak at we tas 500 çapyksuwar bolupdyr.
Bu tapyndy seýrek hasaplanýar. Mazarlykda ýüzden gowrak at we bir erkek adam bar. Alymlar munuň rimlileriň atlary harby maksatlar üçin nähili ulanandygyna has gowy düşünmäge kömek etjekdigini belleýär.
Arheologlaryň aýtmagyna görä, ölen haýwanlar at galasyndan, takmynan, 400 metr we raýat şäherçesinden, takmynan, 200 metr uzaklykda jaýlanypdyr. Läşler arabada daşalypdyr we gapdal ýatyrylyp, çuň bolmadyk çukurlarda jaýlanypdyr.
Galyndylara görä, atlar dürli wagtda kesel ýa-da şikes sebäpli ölüpdir.
Atlaryň biri iki sany küýze we uly bolmadyk ýag çyrasy bilen birlikde tapyldy.
“Bu ýerde biz eýesiniň öz aty bilen aýratyn ýakyn arabaglanyşygyny görýäris. Hatda 1800 ýyldan soň hem bu jandaryň ölümine gynanç henizem duýulýar” – diýip, arheolog Sara Rot belledi.
