O-de-Frans Politehniki uniwersitetiniň alymlary suratlaryň hakykylygyny anyklamagyň täzeçil usulyny işläp düzdüler. Bu oýlap tapyş kendiriň ýüzüne fiziki täsir etmegi talap etmeýär. Tehnologiýanyň anyk beýany Surface Topography: Metrology and Properties ylmy žurnalynda çap edildi.
Bu usul suratlaryň ýokary durulykdaky sanly şekillerini üç ölçegli (3D) kartalara öwürmäge esaslanýar. Fraktal hasaplamalaryň kömegi bilen ulgam üstüň büdür-südürligini we suratkeşiň çotga uruş aýratynlyklaryny seljerýär. Awtoryň suraty çekende galdyrýan özboluşly yzlary wagt geçse-de üýtgemeýär diýen ýalydyr we ol her bir ussadyň şahsy «goly» bolup hyzmat edýär.
Synag netijeleri.Täzelik Winsent wan Goga degişli edilýän suratlaryň ýüzünde şowly synagdan geçirildi: ulgam «Sürümçiler» eseriniň galpdygyny derrew anyklady. «Monmažurda şapak batyşy» suratynyň görkezijileri (onuň hakykylygy ozal başga usullar bilen subut edilipdi) wan Goguň äheňi bilen doly gabat geldi. Bu tehnologiýa Winsent wan Goguň we XVII asyryň şwed suratkeşi Dawid Kleker Erenştralyň çotga uruşlarynyň arasyny aýdyň tapawutlandyrmagy başardy. Şularyň özi-de onuň giňden ulanylyp bilinjekdigini subut edýär.
Sungat bazary üçin ähmiýeti. Seljermäniň adaty usullary (bilermenleriň pikiri, gelip-çykyş taryhyny öwrenmek, reňkleriň himiki seljermesi we sanly seljerme) netijelidir, ýöne olar gaty köp yhlas talap edýärler we hemişe takyk jogap bermeýärler.
Galplaşdyrmak meselesi häzirki wagtda örän ýitileşýär. Meselem, emeli aň iri onlaýn meýdançalarda Mone we Renuaryň işleri hökmünde satylmaga synanyşylan 40-a çenli galp suraty tapmaga kömek etdi. Täze galtaşmasyz çemeleşme nusgawy ekspertizanyň ýerini tutmaz, ýöne medeni mirasy has netijeli goramaga kömek edip, esasan-da, materiallaryň himiki seljermesi bilen utgaşdyrylanda onuň üçin güýçli goşmaça bolar.
