Ýakynda «Euronews» telekompaniýasynyň döredijilik topary ýurdumyzda saparda boldy we Türkmenistanyň Halk Maslahatynyň Başlygy Gurbanguly Berdimuhamedow bu abraýly telekompaniýanyň habarçysy Loro Bakwelliniň sowallaryna jogap berdi. Bu barada TDH habar berýär.
Türkmen halkynyň Milli Lideri söhbetdeşlikde ýurdumyzyň içeri we daşary syýasatynyň esasy ugurlaryny, dünýä gün tertibiniň üns merkezinde durýan suw, energetika meseleleri, ählumumy hem sebit hyzmatdaşlygy barada Türkmenistanyň garaýyşlaryny beýan etdi.
Söhbetdeşligiň dowamynda Gurbanguly Berdimuhamedow Russiýa — Ukraina ýagdaýy babatda garaýyşlaryny beýan edip, ýurdumyzyň Bitaraplyk hukuk derejesiniň Türkmenistanyň alyp barýan daşary syýasatynyň esasydygyny belledi. Türkmenistan bu ugurda üç düýpli garaýşy beýan edýär:
“Syýasy taýdan, Türkmenistan halkara dawalara gatnaşmaýar hem-de goşulmaýar.
Hukuk taýdan seredenimizde, Türkmenistan ýurtlaryň arasynda döreýän ähli jedelli ýagdaýlary BMG-niň Tertipnamasy we halkara hukugyň ykrar edilen düzgünleri esasynda çözmegiň tarapdary bolup çykyş edýär.
Dünýä garaýyş babatda aýdylanda, Türkmenistan halkara gatnaşyklarda güýç ulanmak usullaryny goldamaýar. Sebäbi uruş emele gelen ýagdaýlaryň çözgüdi däldir we bu ýagdaý iş ýüzünde ençeme gezek subut edildi. «Urşuň ýeňen ýeri ýok» diýen ajaýyp türkmen pähimi hem bar. Biz şu dogry garaýyşdan ugur alýarys we mundan beýläk-de ugur alarys” diýip, Gurbanguly Berdimuhamedow belledi.
Söhbetdeşligiň dowamynda gürrüň edilen beýleki sowallar dogrusynda TmCars.info aýratynlykda durup geçer.
